Statuses

أكره الوطن,وأحب وطني

In أخلاقيات, عام on 19/12/2010 by t7l6m مصنف: , , , ,

كنت كاتب بوست من أمس على أساس أنزله اليوم لكن البارحه ماقدرت أنام .والله يجازي إللي كان السبب

طول الليل قعدت أفكر ووصلت إلى قناعة,و يقين, و آمنت

أشهد أن لا إله إلا الله
أشهد أن محمد رسول الله
أشهد أن الوطن لا تتقي الله
في الكويت

أمس جنابهم حاطين بالصفحه الأولى صور “مطّاعات” مع بعض التعليقات إللي مثل وييوهم

فسري لي يا جريده يا من تدّعين الحياديه,وتعتقدين بالمصداقيه,وتتوهمين حرصك على مصلحة الكويت
مبررات وضع هذه الصور والنتيجة التي تتمنونها من تقريركم البايخ بوصفحه كامله داخليه.
هل هو :
تهديد مبطن بأن العصي جاهزه ,وهذا مو شغلكم ,شغل الحكومه.ولا تدخّل عصّك بشي مايخصّك.

أو شماته باللي إنطقوا وطنازه عليهم ,وترى كل كويتي إنطق وكلنا تألمنا لما حدث وعلى رأسنا صاحب السمو الأمير.

أو تحريض وإستفزاز وإثارة الحميه والتحدي وجر البلد لمزيد من المواجهات التي لا يتمناها إلا من يريد شرا بالكويت من أهل النفوس المريضه والضمائر العفنه.

و أرجوكم لا تستعبطون وتقولون هذا تقرير ومقابله مع الشركة المورده للعصي فهذا كلام ماخوذ خيره,ولا ينطلي علينا .

وحيث أن الظروف الحالية تتسم بالشدة والتشنج وتضارب المواقف,وصاحبها إجراءات إستثنائيه ندعو الله أن لا تتكرر,فإن التهدئة مطلب أساسي من الجميع وأولهم الإعلام.

والله يعلم أنه لو كانت بيدي السلطه والقرار جان سكّرت جريدتكم وتلفزيونكم وكل الجرايد والمحطات إللي ما تخاف الله في بلدها .ولو عندي سلطه إضافيه أعلقكم من ريولكم بالجزيرة الخضراء لتكونوا عبرة لمن يعتبر.

وحيث أني لا أملك سوى كي بوردي,ولا سلطة لي سوى على نفسي وبيتي فقد قررت حظر دخول جريدتكم ,الظالمه بحق الكويت ,بيتي وطلبت من وزارتي إستبدال جريدتكم إللي إييبونها لي بأي جريدة أخرى.

وأدعوكم ياشباب ويا شياب إلى مقاطعة الوطن تلفزيونا وجريدة وكل القنوات والجرايد إللي تفرق بين الكويتيين وتصب الزيت على نار الخلافات وتفخ فيها.
لازم يكون لنا موقف ولازم نجهر فيه لازم نسمي الأمور بمسمياتها
آنا اكره الوطن وراح أقاطعهم
ولو كل واحد يقول نفس كلامي راح نأثر بأعلامنا أو نطّيح حظه إذا ما إستعدل وقام يشتغل لمصلحة الكويت.
أرجوكم ,إذا تحبون الكويت
لا تخلوني بروحي,قاطعوها معاي وفضحوها .
وفي الختام,أتمنى الوطن تشتكي علي وتكسب القضيه وتطلب تعويض وتبيّعني كل إللي عندي.
لأني راح أفتخر زياده إني غثيتهم وحرّيتهم وصرخت بويوهم:
ما أواططططططططططططنكم

Advertisements

22 تعليق to “أكره الوطن,وأحب وطني”

  1. انا معاك الوطن سلبية لابعد الحدود وانتقائية بطرحها وشخصانية باخبارها، قبل اسبوعين استضافوا جمال الشومر مدري ساحر أو كاهن او مخرج الجن عصب على تلفزيون الوطن وقالهم انتو ماعندكم مصداقية وكذابين طبعا كشفوا امورة وانه نصاب،.وقبل يومين صادوا الشومر بوضع مخل مع جنس أو وحدة .من سنين وجمال الشومر معرووف وينكم عنه معقولة علشان سب الوطن تسوولة كمين وتفضحونة، أنا اشوف ياكاتبنا الحلو ان تدير بالك منهم لان الوطن صارت دولة مو جريدة وتلفزيون ويمكن يسوولك كمين دير بالك.

    • شوف لنا واسطه تحسبا للكمين
      بعدين شهاقيني أكون بوضع مخل
      قايلك خف علي بتعليقاتك

  2. تصدق

    انا بعد استغربت الموضوع

    وليش الحين

    خلصت المواضيع

    !!

    حسيت ان الموضوع يحمل رساله مبطنه

    شي يلوع الشششبد يعل شبووودهم البط

    وينك انت من زمان عنك؟

    • إن شالله وضحت الرساله
      وإن شالله وياي بمقاطعتهم الله يقطعهم

      آنا موجود ومتابع مدونتج وأدري بالبوستات إللي منزلتهم لكن أجلت القراءه من حرّ مافيني
      الواحد فقد الذوق والمزاج من الأحداث البايخه ودخلت موود أبيخ
      الحمدلله بدأت الأمور تتحسن وسنعود بإذن الله
      وبتملّون من تعليقاتي
      حياج الله ومنورتنا

  3. فقدت بوستاتك ..
    احس فاتتني بوستات وايد
    و على طاري الوطن ..
    اول ما قريت العنوان خفت ..
    قلت اكيد بتهاجر ..
    بس طلعت الوطن آز وطن ..
    ما استغربت .. اهي صاحبة الفتن ..

    صبااااااااااحك نويـــــــر

    • الله يهديج تفقدينها بمزاجج وإللا إحنا شغالين mass production يوميا لنا بوست
      لا تخافين ماكو هجره إن شالله .إحنا نسافر يومين ونفقد الكويت شلون نهاجر

      صباحج فل وياسمين

  4. وي وي جنه حصلنا زفة
    والله مو بمزاجي .. مو قصدي والله
    ادري اني مقصرة ..بس كنت بقول الصج
    فاقدتهم …و يعطيك العافية .. على كل بوست
    بكل يوم ..و كل ساعة ..
    السموحة ههههههه

    • العفو يالنور
      وماعاش اللي يزف ضيوفه
      وما من قصور
      كنت أقصد إن زيارتج تسعدنا وتعليقاتج تشجعنا
      الله يعافيج بكل لحظه

  5. الوطن من زمان انا و اهلي مقاطيعنها من زمان و اهيا مصدر كل فتنه تصير بالكويت سواء من الجريده و لا من قناتهم البايخه للاسف يستغلون سالفة حب الكويت و الخوف عالديره و اهم من اهم عوامل فساد هالديره .. شنو اخس من الفتنه خلت كل كويتي شايل عالثاني !!
    يا رب تضعف شوكة كل واحد يستغل هذا الوطن و شعبه
    اشكرك على موقفك الجميل بمقاطعتهم زين ما تسوي و مقالك جميل جدا كعادتك 🙂

    • والله يا بوكيه إنتي واهلج طلعتوا أشطر مني ومن ناس وايد ماخذين مقلب بالوطن
      ومع الأسف تصّنع حب الكويت أصبح تجارة رائجه ولكن الأهداف واضحه والنتائج نراها أمام أعيننا
      اللهم رد كيدهم في نحورهم

      وشكرا على الإطراء وعلى زيارتج
      حياج الله ومنورتنا

  6. تدري اني من شراها اللي خبرك..
    وصارت لعبة بيد هالياهل اللي ما يدري شيسوي فيها
    وانا مقاطعتها.. احيانا اقراها بس من باب اعرف عدوك
    بس مايستاهلون لا اشتريها ولا اشترك فيها
    وتلفزيونهم بعد مثل ويووهم..
    والا شتفسر انهم ما يابوا طاري كلش عن كلمة الدكتورة اسيل العوضي؟؟
    ليش انها قالت كلمة حق.. واهم ضد الحق

    انا مريضة ومالي خلق النت بس دشيت لي ربع ساعة ولهت عليكم
    حتى مدونتي مالي خلق اشوفها..
    ومارديت على تعليقاتكم على بوستي الاخير..
    عاد اعذروني..

    • سلامتج وما تشوفين شر وأجر وعافيه
      فعلا فقدناج

      زين تسوين مقاطعتهم وإن شالله كل الكويت تقاطعهم

      إنتي بس ريحي وصحصحي
      ألزم ماعلينا صحتج يالليوان

  7. يقول الرادود ش حسين الأكرف في أحد لطمياته عن جريدة الوطن البحرينية وأنا أقصد الكويتية بهالكلمات

    صفحات الوطن خراب الوطن
    كأنها البعوض ذاق شيئا وطن ( يعني طار )

    تحياتي

  8. و الله انا يايه اقول معاك ” ما اواطنهم ” بس قريت اول تعليق وردك له وخفت
    مالي خلق يسون لي كمين بعد =\

    انا من زماان موقفه عنهم لا برامجهم ولا جريدتهم مع اني قبل ماكنت اقرى الا هم و لا اتابع تلفزيون كويتي الاهم .. بس صراحه الكل لاحظ الانحطاط الي وصلوا له

    و تونا قبل جم يوم باليمعه قاعد اقولهم – بعد ماشفنا دعايه حق برنامج ايمان نجم – كل من هب ودب سوو له برنامج خاص فيه @@ العيسى مع غاده و هذي مالت سبوت لايت
    هاااو شسالفه هذيل صغار و مو معروفين و صراحه البرامج خايسه =\
    و اي تذكرت .. المنصور وينه ؟ لي الحين يطلع ؟ ما ادري منو قص عليهم وقالهم يعرف يقدم برامج

    بس مقاطعتي للاسف بروحي مو قادره على الاهل احنا بيتنا توصل لنا 3 جرايد من الوطن =\
    و بالكليه كل التصريحات الطلابيه للقوائم و النوادي على طول نتعامل مع الوطن

    و الصرااحه اكثر شي كرّهني فيهم
    ” اكاديميه الوطن ” شيبون من وره هالشي ؟!!
    خرابيييط و بلاولي

    و الله خايفه يصير فيني شي بعد هالتعليق
    و السموحه طولنا عليك 🙂

    • أشكرج على التأييد
      و زين تسووين فيهم وموقفج مع الوقت يتعزز وبإذن الله يقتنعون الأهل

      والواحد ماينكر شطارتهم في تسويق نفسهم لكن مع الأسف عن طريق الإثارة والتفريق بين الكويتيين و الترويج للمشاكل

      ولا تحاتين شي كلامج حق وإن شالله جهاد
      حياج الله وتسعدنا تعليقاتكم

  9. يه يه يه خفت من الكمين …

    توك تتمنى يرفعون عليك قضية و بيعونك الخيط و المخيط و الحين تخاف من الكمين مهي الهقو خلك أبضااااااي …

    شوف أخوي أنا من أنصار روتانا سينما بصراحه من زمان و أنا تاركة القنواة كله و مصاحبة روتانا ما عندهم إلا وساعة الصدر مره فلم سنع و مرة بايخ بس مالهم شغل بشي ناس مطربه روحه

    المعنى يا خوي كل كلمه عليها من الله حارس و الله العالم لا اتمنى على نفسك شي ربي يحفظك و يصونك لعين ترجيك 🙂

    • شفتي شنو نوع الكمين المذكور بالتعليق.ماعندنا إلا سمعتنا .
      و إذا إنتي عندج روتانا أنا حدي السينما و دي في دي

      سبحانه الحافظ والله يحفظنا أجمعين
      ومشكوره يالجودي وحياج دوم

  10. الوطن هي اكثر الصحف المحلية مبيعا و الفارق بينها و من تليها ترتيباا كبير جداً !!!!
    قناة الوطن التلفزيونية تحظى بنصيب كبير من المتابعين !!!!
    الكثير من المهتمين بمتابعة التلفزيون الكويتي (خارج الكويت) يتابعون قناة الوطن!!!!
    الكثير من البرامج الفكاهية المسخرة تنتجها قناة الوطن!!!!

    الفتنة في الكويت لا تنطفأ و كانها تزود بالوقود من آبار النفط الكويتية، سمعة الكويت في الخارج رنانة (لدي قليل المعرفة) ، المسلسلات الفكاهية الكويتية اصبحت مسخرة و طنازة فقط البرامج الحوارية اصبح الغرض منها البعطزة .

    اتمنى على كل مواطن و مقيم ان يكون على قدر من المسؤلية لمقاطعة اي جريدة او محطة ، تسول لها نفسها العبث بالوطن .

    • شوف أكو أغنيه في أحد أفلام محمود عبدالعزيز يقول فيها
      “إديني بالهايف وأنا أحبك يا ننانس”
      مع الأسف تردي الذوق أصبح سمة الإعلام وجر معاه إلى الأسفل ذوق الناس

      وياريت الناس تعي الدور المدمر للكثير من وسائل إعلامنا وتقاطعه
      حياك الله دوم ومنورنا

  11. اليوم واحد من الربع حاط صورة مجموعة من الناس و اهم يقطون صناديق جريدة الوطن في الزبالة، أنا ما شفت جريدة الوطن و لا أشوفها، لكن بناء على مقالك اقول زين سوت الناس، و اقول الحمدلله ان في ناس قد المسؤلية .

    • إن شالله ماتخلى الكويت من اللي يتحملون المسؤليه
      وياريت تعي وسائل الأعلام موقف المواطنين منها
      حياك الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: