آخر الأسبوع,قلت تباً للسياسه
وطشتاً للتحلطم والمغثه
Be cool,relax,and enjoy
خرابيطي الخياليه
طلعت من البيت دايخ أذوني أخواني أذيه
قلت أضيع وقتي اتمشى شوي بالجمعيه
بسرعه قصني اليوع قلت آكل فلافل وطعميه(مو ذاك الزود ويا الفول)
هونت ,غيرت رايي ,قلت اول الشهر تعشى بومبي السالميه
مريت جسّوم على طريجي وعقبها شانت النيه
سألته ,ها بوحمّود شرايك تخاويني السالميه؟
قالي أفا عليك, آنا وياك لو تبي تروح الصبيه
جسّوم ونيس وحبيّب ,مو من هذيل النجريه
(منظرنا)
كشخه ,غترنا عالجتف, شغل عدل وإزقرتيه
من وصلنا شفت ثنتين قمنا نلاحقهم جنا حراميه
قلت حق جسوم شوف أم الحمر ,إبتسامتها مو طبيعيه
قصيت عليه خفت يدبّسني فيها وشكلها جنها هنديه
غمز لها جسوم ,ضحكت, وبسرعه صارت علاقتهم وديه
وأشّر لها ولحقته عند فترينة ملابس نسائيه
وعيني مافارقت رفيجتها عجبتني وايد هالبنيه
شفتها بعيني غزال, شفتها ورده, شفتها ملاك, مو إنسيه
طول وحسن, الشعر كستنائي يتكتكت ,وعيونها عسليه
لاتلوموني إنثولت عمري ماشفت مثل هالجمال بكويتيه
والكويتيه أم الذوق والحِسن ,وتحسدها كل خليجيه
مَسْرَع ماقام قلبي يطقطق تقول سياره أثريه
دوختني وأسرتني ,وعذبتني بشرتها الخمريه
دنيت وسمعت صوتها, بلبل يغرد أحلي أغنيه
همست : إنتي صج ولا آنا بأحلام ورديه؟
قلت مو وقته تزفني ,وطقتي تصير ملحمه شعريه
إلتفتت ,طالعتني بخجل ,أشوه طلعت حياويه
قلت آسف أحرجتج بس لا تلومين قتيلج يا بنيه
إنتي خارج وصف لغتنا و قواميس الإنجليزيه
إنتي شعر, إنتي فن, إنتي هندسه معماريه
إبتَسْمَت دوختني زياده ,يابتلي لوثه عقليه
قلت إنتي مو من طين مخلوقه ,إنتي روح عذبه نقيه
إنتي عنوان الجمال إنتي هديه للبشريه
ويقولون قيس عشق و قِصد عنتر ولد الأفريقيه
مادروا بلّي أسر قلبه إبتسامة الكويتيه
قالت ما أعبر علي هالكلام خف علي شويه
أدري حافظ هالحجي ,وتقوله حق كل بنيه
شكلك ويا غترتك, واحد من المغازلجيه
ياي تقص على ,وتكشخ عند ربعك الهتليه
قلت: شفتي كلامج ,ترى أعتبره سيمفونيه
راضي لو تزفّيني جدام جمهورالعربي و القادسيه
و قابل تزفيني كل يوم بالليل وتشرشحيني بالظهريه
تشّقِقت وضحكت وطلعت أسنانها الؤلؤيه
قلت يازين هالضحكه جنج ورده وفرقتها الماسيه*
سمعي يبا لاتفهميني غلط ,آنا من هالنوعيه
ماني مغازلجي وترى عمري ماكلمت بنيه
آنا أبي أتعرّف قبل لا نبدي حياتنا الزوجيه
وعطيتها الرقم ,خذته وإبتسمت
ولي يومك ما إتصلت .
النصّابه.
*ورده الجزائريه وفرقتها إسمها الفرقه الماسيه.
T7l6m 
lool 9a7 lsanik 🙂
BookMark
وهم ماكو فايده
حياج الله
هههههههههههههههههههههههه
حلوة حلوة تحلطمنا 🙂
شكرااااا
قلعتك مااتصلت هذي حوبة جسوم واعليه
اللي خذا الشور منك وعميت عينه قام لحق هولة ينيه
شيشتني اقول قصة مغازل قديمة كنا مشحونين إبي أم ولاحقين مرسيدس كحلية
احنا ستة وآنا قاعد ورا بالنص واهم ثنتين وحده سمره ووحده وردية
كنا تبتون وراهم وآنا مالي أمل ارقمهم جان اتيي ابالي خطة جهنمية
شكلهم يتضحكون حق اللي جدام وفلست لاني ورا بوسط الشقردية
وقفنا بإشارة حمرا جان اتحبل لين شبت خضرا وفجأة سويت حركة بهلوانية
نزلت من سيارتنا وركبت عندهم ورا وقلت يلاا حركاي يا ابنية
البنات انصدموا والربع فاجين احلوجهم واللي اتسوق من الصدمة اوقفت شوية
بس الهرنات اشتغلت من ورا جان اتحرك فيني وهم بين تكركر وبين صدمة عصبية
قلت حرام عليكم اتبتونون فينا تبون اذبحونا بسبة امغازل ورانا مستقبل وحياة مهنية
قالت يالمينون انزل احنا امسايرين اهلنا جدام ورايحين شاليهات ضبيعية
قلت لها ما اقدر انا خايف ننقلب شوفاي قلبي اشلون يرقع وجان آخذ ايد الوردية
واحطها على قلبي وجان اتقول اي والله حيل يرقع والربع يشوفون ومذهولين امية بالإمية
وعقب جم سالفة وضحك اقنعوني انزل وركبت عند الربع بكل فخر ومنتفخ شوية
ويوم قالولي رقمتهم قلت اوه ! نسيت ومن صجي نسيت من هول اللي سويت والانفعالية
ومن الحرة طاحوله الربع تكفخ فيني إلى الفنطاس وأقسم بالله انها قصة حقيقية
🙂
والله منت سهل
عيل أنا البارحه إتصل علي صديق الطفوله والمراهقه و روومايتي أيام الدراسه
يقولي شكلك بالبيت قلت له قاعد اكتب قصيده عنونها مغازل السبعينات
قال شلون تكتب وإنت مو مغازلجي؟شلون تعرف؟
قلت له يخرب بيت التدوين قمت أكتب كل شي إيي على بالي
وأقسم بالله إن إذا كلمتني وحده أستحي وأتدوده
منورنا يالصعب
أحلى ما فيها هالتدوينه إن فيها حركات تصلح تتوثق بداية من الغترة إلي على الجتف لي المغازل إلي بالسالميه لوووووووووووول
و بعدين تحلطم شخبار وردة والفرقة الماسية صج عتيجة
أما جاسم و قصته بدع
جاسم منت هين اتخوف
فاتج من التوثيق مطعم ومبي كان أول مطعم junk food
ورده صج عتيجه بس بذمتج وين أغانيها و وين أغاني هاليومين من طقة (أحبك يا حمار) وشخبط شخابيط
وحدج على جاسم
وبدون جرأه وشطانه أيام الشباب شلون الشخص يستقر
Loooooooooooooooooooooooooooooooooooooooooool
تحلطم والله دعيتلك بالجنه و الفردوس و السعاده الابديه
ماتصدق شكثر كنت مطنقره من الدراسه
جان احوس بين البلوقات وطحت على هالتدوينه
و انشرح صدري وانا اقراها وقمت اكركر
و الحين برح اقراها عند الاهل
اخيييه طلعت نصابه ومادقت
بس ستوب ” الغتره على الجتف” كشخه ؟!!
وطلعت تعرف تصفصف كلام مغازل حلو
جنك “محسن ” الي بالروايه الي قاعد اقراها على هالكلام المصفصف
تسلم ايدك ويزاك الله خيير
ومسائك حليب مهيل على الدوا ودرابيل و هرده
🙂
جزاج الله خير على الدعاء وعسى الله يتقبل
وعلى هالدعاء راح نبطل تحلطم وحتى القطوه بنهدها إذا شعرنا التخنبقي جذي تأثيره
وبعدين شلون تحوسين وتطيحين على البوست ما ارضى ابيج إتابعين
أنا كل يوم أنزل بوست
الغتره على الجتف كانت شغل عدل بالستينات والسبعينات كما يقال
منو محسن؟شنو إسم الروايه؟ ومن تأليفه؟
الله يسلمج
وصباحج جباتي وجاي حليب
حياج الله دوم
لالالالا اخ تحلطم لاتفهم انا مومتابعين المدونه اول باول
لا ترى متابعينها عدل و اذا مر يوم مانزل بوست قلنا عسى ماشر
بس هالفتره مثل عقاب للنفس .. ننحرم من النت الى انتهاء الامتحانات ;qq
و لاتبطل تحلطم .. بعدين شلون نطلع حرتنا من العفسه الي صايره ؟!
و اسمحلي القطوه ماتقدر اتوقف عنها وله ترى نص المتابعين يقومون عليك ;q
ايه سالت العيايز الي عندنا .. وقالوا ان الغتره الي على الجتف شي وكوول
وحدهم استانسوا على قصيدتك .. وفتحت باب الفضايح عند عيايزنا وكل وحده تقول الي غازلها والي رقمها .. وترى دللت على بلوقك ;q
سلمك الله
محسن = بطل الروايه
اسم الروايه = عصفور الشرق .. من ناحيه الفكره فهي عاديه تقريبا لكن الي تحمله بين طيات السطور نادر وقيم 🙂
المؤلف = توفيق الحكيم .. هذا كاتب عجيب يصيغ لك الفلسفه بشكل مبسط وسهل وحلو
وين تلقاها = مكتبت افاق العامره امدها الله بسيل من الكتب لا يتوقف 🙂
هذا اذا تبي تقراها و انصحك فيها
ومانقدر على الجباتي و حاي حليب 🙂
الله يسعدك دنيا و اخره
الله يسعدج
و جزاج الله خير على الدعاء وعلى الترويج للمدونه
والحمد لله ونست العيايز وأنعشت ذكرياتهم
توفي الحكيم تنصاد كتبه بسرعه وأفتكر سووها فيلم ومثله نو الشريف إذا ماني غلطان
مسألة التحلطم تجري بالدم وصعب نبطلها والقطوه صارت عزيزه على قلبي وما أقدر أوقف قبل لا أختمها بإذن الله
حياج الله دوم
الله يوفقج بالإمتحانات والتركيز بالدراسه أهم من التحلطم ,لاحقين عليه
بدددددددددددددددددعت
ههههههههههه الله يونسك بالعفو والعافيه
شنو غيرت جوي على هالشعر العجييييب….
وانا اقرا الردود ضحكتني انت وجاسم..
مو اهني تطلع تكتكت وفنون التدوين
انك اتسوي كل اللي مايتسوى…
وتكتب كل اللي ماعرفته….
عسى ربي يسعدك دنيا وآخره
امتناني
مشكوره سلتنا والله يعافيج
الحمدلله غيرلج الجو شعرنا
الله يسعدج ويهنيج يارب على هالدعاء والروح الطيبه
منورتنا
وممتن لزيارتج
و الله انك عجيب و محاولة وصفك مهما كانت اعتقد انها لن تفيك حقك، بس انا اصدق جاسم ما اصدقك يمكن انك عاجل لكنك اكيد محرض، سكوتي لوتي علي ما يقولون.
شكرا على الإطراء
وعادي إذا تبي تمدحني قول اللي عندك(أتغشمر)
صدقني وصدق جاسم ثنينا حلفنا
ماكنت سكوتي كنت نجري(ولا أزال)
وماكنت عاجل،بس مو محرض
شكرا على الزياره وحياك الله دوم
هههههههههه ضحكتني بس ما أقول الا
صح لسانك
الحمدلله عجبك وضحكك البوست
كنت أقصد أريح الناس وأطلعهم من أجواء المغثه،واتمنى إن ربي وفقني وقدرت أرسم بسمه
وأقولك صح بدنك
حياك الله ومنورنا بزيارتك وخلك جريب
هههههههههههههههههههههههههههههههه
الحجي مووو طبيعييي
قمت اضحك بروحي جني مينونه
تسلم ايدك D:
شكرا بوكيه
هذي شهاده أعتز فيها من شاعره وفنانه وأديبه
الله يسلمج
اسعدني ضحكك والزياره واتمني استمرارهما
حياج الله
حدة عجيبة ذكرتي بالشاعر البحريني الكبير عبدالرحمن رفيع
حدك المزاج صح ادري شلي مخليك جذي
بس لمه ارجع راح اقولك بيني اوبينك و واحد تعرفة عدل
يالحبيب الله المستعان
شكرا على ذوقك
والله المزاج ماكان صح يوم أكتب وبسبب سوء المزاج قررت أكتب شي يونسني
والحمدلله عجبكم
إن شالله ترجع بالسلامه
ويمكن الله يهديني وأكتبلك شعر بمناسبة العوده وأسميه
(عودة النجري )
والله المستعان
لوووووووووووول والله انك كسرت خاطري
والبنت كبرت بعيني … شوف البنت شكلها ماتببي مشاكل يمكن مرتبطة او ماتبي تكلم فبدل ماتزف وتقول مابي خذته مجاملة … وانت احسن من غيرك في شباب نشبة دقي الحين يالله دقي دقي … يوقفون بالبلعوم … بس شكلك حبيتها دام للحين متذكرها 🙂
شوف اذا فيها خير لك اتمنى تتقابلون مرة ثانية يارب ويجمع ربي بينكم واذا مافيها خير لك ان شاء الله خيرة انها ما اتصلت فيك : )
والله يا طموحه
وقسما بالله والله على ما أقول شهيد
إن القصيده من نسج الخيال
وعلى فكره تفختيني إنج فكرت بواقعية القصيده
وشجعتيني على الكتابه
شكرا على الزياره
وحياج الله
من نسج الخيال ولا المغازل عندك بالبال، وهذي السالفة قديمة ولا يديدة وانت والله اعلم عميت على نفسك من وزارة الداخلية بس انا اتوقع والله اعلم ان هذي السالفة بسنة 84 صح يعني عمرك قارب الحين 50 الا شهرين (العمر كلة)
أقسم مره ثانيه إنها من نسج الخيال واعنوان واضح أن الأحداث وقعت بالسبعينات
وبالتالي التاريخ وتقدير السن مالهم أي صفه
منورنا وحياك الله
وخف شوي علينا بتعليقاتك
دايما متهمني ظلماً
الله يونسك بالعافية مثل ما ونستني
يا حلو هالقصيدة العجيبة …
و يا حلو المساجلة من جاسم ..
احس تصلحون ربع 🙂
الله يعافيج ويونسج دوم
والحمدلله عجبتكم
و تعليق جاسم بوست بحد ذاته وأحس قاعد يتدرب ينافسني بقصايدي الخربوطيه
الله يشهد إني ماشفته وما عرفته إلا عن طريق المدونه بس سبحان الله
إحتل قلبي بسرعه وصارت له معزه خاصه ومكانه كبيره وتقدير عندي بسبب إنسانيته
وأكبر دليل عليها تعليقه.
حياج الله يالنور
وماراح أضيف شي إذا قلت منورتنا
منت هين والله اني طول هالمدة عبالي امممممممم شقول “شبح” والله زين اتسوي فيك البنت ما تتصل
يبا الموضوع خيااااااااااالي ومليون مره حلفت
حيا الله الليمو
على طاري نسخ الخيال والله تمر علي مواقف ياخوي أألف قصة من مخي واذكر تفاصيل الي يسمعها يقول جنه صج صاير ومو بس انا وايد مروا عليهم جذي … ويصدقونها أما السوالف الي صج تمر علي ما يصدقونها لوول
هذيً موهبه ليش ما تكتبينها قصص
عندج بلوج ونشري فيه ماترينه مناسبا للنشر
ومع الوقت إن شالله تصيرين مؤلفه عظيمه