Articles

خوش وبوش

In إقتصاد, عام on 16/12/2010 by t7l6m

طبعا لا داعي للإيضاح أن المقصود بالبوش مو رئيس أمريكا السابق ولا أبوه ولا أمه باربرا
البوش مقصود فيه خرطي ومامنه فايده
وهو مقصد صديق عندما وصف التأمينات الإجتماعيه
يسألني تذكر كتاب عبدالله النفيسي “الكويت الرأي الآخر” قلتله بيييييييييييه صج إنك مغبر
يقول كان بالكتاب صورة خروف مربوط بوتد خيمه والتعليق على الصوره “بطن خوش ومجلس بوش”
قلتله شياب الطاري؟
يضحك بسخريه ويقول:
تذكرت السالفه وآنا عند التأمينات
“طلع المبنى خوش والروتين بوش” .المبنى حلو ومتعوب عليه وعرباين الجاي والقهوه بالممرات ومعاهم سلال متروسه بسكوت,لكن تعال سوّ معاملتك نستغرب من العقليه المتحجرة والتخلف الإداري.
قلتله:من صجك؟التأمينات ؟
قال:إي التأمينات ماغيرها .شفيك مو مصدق.لو تسمع سالفتي تشوفلك كلمه ثانيه.بوش شوي عليهم.
قلت:سمعني.
يقول:رحت بمعاملة إستبدال أثناء الخدمه (يبيع معاشه) معاي كتاب الوزاره والطلب كامل.شافته الموظفه و قالت البيانات مو واضحه على الجهاز ويابت الملف وقعدت تفلّيه ورقه ورقه وتالي قالت الملف ناقص.
– شنو ناقص
الموظفه:كتاب تعيينك بالجمارك.
– بس إختي آنا تعيّنت قبل 28 سنه وإنتقلت من الجمارك والحين لي 22 سنه أشتغل بالماليه.
الموظفه :صح أخوي بس لازم الملف كامل ولا ماتمشي معاملتك
– تبيني أدور ورقه صار لها 28 سنه
الموظفه: لازم تييب قرار التعيين من الجمارك.
– زين إنتو ماعندكم إتصال ويا ديوان الموظفين ,تدخلون على جهازهم وتاخذون البيانات وتريحون المراجع.
الموظفه: إذا مايبت القرار إحنا نراسل الجمارك ونطلب القرارمنهم.إحنا نتعامل مع الجهه مو مع ديوان الخدمه .
– على ماتطلبون الورقه ويدرون الإخوان بالجمارك ولا جود الله رازقني وما أحتاج أبيع المعاش.
وهدهم ومشى.

وقعد يتحلطم عن التخلف الإداري وشفايدة الكمبيوترات والفاكسات وإنهم بس يبون يمرمرون المراجع.

قلت له توك تدري إنهم يحسبون إن المراجع يشتغل عند أهلهم إللي خلفوهم
وشاركته التحلطم,
قلت:آنا أيام بنيان البيت رايح أكمل إجراءات تمديد الكهرباء أو أخلص من البلديه طلبوا مني ورقه من الإحصاء.
وصفوا لي وين الإحصاء,ورحنا الإحصاء ويقعدوني عند واحد قعد يستجوبني:
كم غرفه البيت؟ شنو التكسيه ؟عدد أفراد الأسره؟ وفوقهم جم سؤال بايخ.يوم إستفسرت عن سبب هالأسئله ولا يقولون لي علشان نسوي تقرير.
قلت بقلبي (عمى بعينكم) وكملت,بس أخوي المفروض تاخذون البيانات من إدارة التراخيص عندكم بالبلديه مو تشحططني لي عندك,هذا شغلك مو شغلي آنا.رد بكل برود”هذي الإجراءات”

والشيء بالشيء يذكر,
قبل جم يوم طلعت وحده من الجرايد بسالفه تفطّس من الضحك:الكهرباء تطلب من الوزارات عدم منح الموظف إجازه دوريه إلا إذا ياب براءة ذمه من الكهربا
يعني بدال لا تدابج الوزاره علشان تحصل فواتيرها تتفرعن على المواطن الفقير المسكين و ما تخليه ينحاش من مغثة الدوام وياخذ إجازه إلا بعد ما يدفع فواتير الماي والكهربا.
مسسسسسسسسسسسكين يالكويتي إنت تتعب علشان الموظف بن (حطوا الرقم السحري) يرتاح.

Advertisements

8 تعليقات to “خوش وبوش”

  1. هههههههههههههه

    أكيد مو 16 أتوقع قصدك رقم ثاني لوووووووول

    تدري شنو مشكلتنا ما عندنا نظام ارشفه معتمد أنا أواجهة هالمشكله في شغلي يعني الملفات الخالصة اشكثرهم شنسوي فيهم ما ندري و في مره نزلت بنفسي تخيل سرداب الإدارة و رتبت و فيلت و ضبطة على الأخر و فق تسلسل و سجل مع إن مو شغلي بالمره و مو المفروض أسويه بس علشان لما ملف قديم يرد ينفتح ألاقيه بسهوله لما اطرش أحد اييبه حلو …

    عقب سنه أو سنتين شي جذي سكرتيرة قسم يمنا طرشت المراسل بملفات قالت له حطهم بالسرداب الأخ ما لقى مكان رجع لها قالها ماكوا مكان و الملفات المرتبه تبع القسم الثاني تخيل شنو قالت ارميهم دول بقوا قدامه بطت جبدي قدامه بعين العدو ملفات مهمه حسبي الله على بليسج قلتهم بالأرض و انا مرتبتهم ومطرشه موظفين ايبون لي ملف قالوا لي الدنيا معفوسه و نروح انا و مسؤولي و مسؤول مسؤولي كلنا نشوف و نصور

    و بس عقبها قلت طاااااااااااف مالي شغل المشكله إن في ملفات من أول ما تأسسة المؤسسة ملفات تعتبر قيمه :\

    • أدري عندنا مشكله بالتفييل بس لا تصير على راس المراجع
      يعني بذمتج معقوله يطلبون ورقه عمرها 28 سنه شدعوه
      ولا يطلبون من المراجع يوفر لهم مغلومه أو بيانات المفروض يبذلون جهدهم علشان إييبونها
      شنو الناس تشتغل عندهم
      بس شتقولين هذي البيروقراطيه
      حياج يالجودي وhave a nice weekend
      والرقم صح مو 16
      sixteen

  2. عااااااااااااااااااااااااااادي

    • مبجر عادي
      بس حضراتهم التأمينات مسوين نفسهم (هاي تك) طلعوا من غير تك
      وسالفة الكهربا تدفعها قبل إجازتك الدوريه قمه في العجز
      وبعدين شفت ان الموضوع جدير بالتحلطم
      ومناسب للعوده الرسميه الي سكة التحلطم وبعيدا عن السياسه
      حرقة دم وتوتر وضيقة خلق وفي الف واحد يكتب عنهااحسن مني

      خلنا على التحلطم الإجتماعي الإداري المروري الإقتصادي الطبي التعليمي وما يستجد من تحلطمات
      وتابعنا وعطني رايك في قصيدة اليوم عن المغازلجي

  3. لا تحلطم هذا كلام لا تفائل كل شي بالحياة هذا التطور بعينه وعلمه لازم تهز طولك وتخلص شغلك عيل تبي الموظف يتعب نفسه انت في بلد التفائل بلد التطور شتبي اقولك اذا هذي حكومتك
    بعد بنشوف شي زين بقول شي (ارتاح ارتاح) يالمتفائل تحلطم ادري شنو بترد علي بس اذا رديت بنفس الكلام المعهود صدقني تدري انه وين تخليني ارد طريج علشان ارد عليك هالمره ترى الحين عندنا درجة الحرارة بس _15 و الله المستعان

    • يا مكسر المياديف
      ولا تخليني أقولك كلام أبو القاسم الشابي
      ما أدري شنو أقول أخاف أرد بنفس الكلام المعهود وتقطع طريج
      والله يكافينا الشر
      شنسوي حجي هذي ديرتنا وهذي مؤسساتنا وموظفينها
      وما لك إلا خشمك لو صار عوي
      أقول دز لنا شوي من بردكم

  4. الله يعين ..شنقول بعد
    بس والله صدمتني بالتامينات .. خابيننا على شنو عيل ؟؟

    يجب بناء العقول قبل بناء الامكنه
    بعدين اشخانة الدورات الخارجية للموظفين للعمل على تطوير انظمة البيانات الاساسية الحكومية والا اهي سفرات وبس على ظهر الحكومة…

    خلني ساكت ساكت لاتنبش جروحي
    ترى فقدنا القطوة..
    نبي تفاؤل يابن الحلال

    🙂

    • ماني معلق على تحلطمج على الدورات والتطوير الإداري مابي أغثج زياده
      آنا فاقد القطوه مثلج وإن شالله هاليومين تشوفين شي كله تفاؤل

      وإن شالله بعد شوي أنزّل بوست غشمري خفيف إن شالله يعجبكم
      وترى كله من نسج الخيال,والله على ما أقول شهيد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: