أكيد شفتوا صورة ولي عهد الإمبراطورية التي كانت لا تغيب عنها الشمس ,الحجي تشارلز والناس يكسرون جامة سيارته.الحادث كان في إطار إحتجاج الإنجليز على رفع الرسوم الدراسيه,وكان عدد المحتجين 20 ألف .الإنجليز بدّعوا بالشرطه تهاوشوا وياهم وحذفوهم بكل شي حتى بكرات البلياردو.
تخيلوا على هذي الأعداد والشدة في الإشتباكات كان عدد المصابين 37 ومنهم رجال أمن.بحسبه بسيطه أسقطت الأرقام على أحداثنا بالكويت وإفترضت أن المصابين المدنيين الإنجليز 35 و2عسكر قسّم عدد الإصابات على المتظاهرين تطلع نسبة الإصابات(0,0175%).وبإفتراض أن عدد المشاركين بديوان الحربش 700 كويتي لكان عدد المصابين وفقا للمعدل الإنجليزي 1,25 يعني كويتي وربع مو 14
بالمقابل لو قواتنا الخاصه فاضّه مظاهرة لندن جان عدد المصابين الإنجليز 400 لأن معدل الأصابات عند الحربش 2%.بمعنى آخر قواتنا الخاصه أقوي من القوات الإنجليزيه ب11,4 مره.
ما أقول لهم إلا كما يقول الحبيب لحبيبته بالأفلام العربيه ” يا آسي”
من فمك أدينك
من بيان مجلس الوزراء بعد ضرب المواطن في ندوة السعدون
وقد عبر مجلس الوزراء عن ادانته واستنكاره الشديدين لهذه الجريمة البشعة التي لم يعهدها مجتمعنا الكويتي وما جبل عليه من روح التآخي والالتزام بروح المسؤولية، مؤكدا رفضه القاطع لاستخدام لغة العنف وما ينطوي عليه من ابعاد تمس امن البلاد واستقرارها وثوابتها.واهاب المجلس بجميع المواطنين تجسيد روح المواطنة الحقة والحفاظ على مقومات الأمن الوطني، مؤكدا ضرورة الالتزام بمواد الدستور واحكامه ليبقى دائما اهل الكويت كما عرفوا نموذجا صادقا للتلاحم والتآخي والالتزام بالنهج الديموقراطي القويم وقبول الرأي والرأي الآخر قولا وعملا والاحتكام الى القانون والعمل جميعا من اجل مصلحة الكويت اولا واخرا.
ما ودي أعلق مره ثانيه على البيان بس ودي أقول يا حكومه ما قدرتي تصملين على بيانج يومين
هذا فيما يتعلق بإستخدام العنف.
والحمد لله صبرت الحكومه 3 أيام على ما ورد في بيانها من الكلام عن النهج الديموقراطي القويم وقبول الرأي والرأي الأخر قولا وعملا,و ثالث يوم ما سمحت حق الجزيره تقابل مسلم البراك.
أتمنى من الحكومه أن لا تصدر بيانات علشان محد يمسك عليها شي أو يعايرها بكلامها .
الليوان وما أدراكم مالليوان:
من أجمل ما قرأت حول شعور الكويتيين تجاه بلدهم
وأعذب وصف للمحبه والشعور الوطني
كلام من قلب كويتيه قحّ ,تقول ما تعرف تصفف الكلام
لكن شوفوا يوم صار الكلام عن محبة الكويت شلون غرّدت بوطنية تعبر عن شعورنا كلنا:
“اقول فعلا ماشفتوا شي
بتشوفون جيل الغزو اللي وعا على التشرد
اشلون بيشبص بهالقاع بايدة وضروسة
وبتشوفون احفاد الطواوييش اللي ما هزتهم الطبعة وكسرة سوق القماش
شلون يحمونها بارواحهم وعيالهم
وبتشوفون احفاد من مات بالصريف ومن شال اعلام الكويت في هجمة عبدالكريم قاسم
اشبيسوون..بنحبها لو كان هذا بس اللي نقدر نسويه..هم بنتم نحبها
وتحيا الكويت
غصب على اللي ما يرضى”
وفي الختام أقول الله يحفظ بلدنا وتهدأ الأمور علشان نبطّل سياسه
ونرجع حق قطوتنا وتحلطمنا اللا سياسي
T7l6m 
صح لسانك يا تحلطمنا..
وشكرن على الدرر اللي تقولها
شكرا
وحياج الله
احتريت من الحكومه تدري المادة 4 4 من الدستور تقول: للأفراد حق الاجتماع دون
الحاجة لإذن أو إخطار سابق ولا يجوز لأحد من قوات الأمن حضور اجتماعاتهم الخاصة .
و الإجنماعات العامة و المواكب و التجمعات مباحة وفقا للشروط و الأوضاع التي يبينها القانون على أن تكون أغراض الاجتماع و وسائلة سلمية ولا تنافي الآداب .
أنا ما أعرف الأوضاع إلي يبينها القانون بس ما اشوف إلي سووه النواب خطأ يستحق إلي صار فعلا الوضع غريب ..
ماسكة الدستور و افرفر فيه بدور للحكومه منفذ جود الاقي شي !!
كلامم الليوان على قوته تدمع له العين
وربي يحفظ الكويت يا رب
ما راح أدخل بجوانب قانونيه مو مختص فيها
بس أقولج لا تعبين نفسج
حتى الأوضاع اللي يبينها القانون ما يفكهم من الشرباكه القانونيه
من شوي حطيت كلام الليوان
إقريه كامل بتعليقات بوست بإذن الله شامخه
ما سويت فيني خير يا خوي
قريت رد الليوان و بجيت احتريت شنو بيسوون أكثر
الله لا يطولهم و لا يوصلون الأكثر وماعاش من يهين هالشعب
يارب
بجيتني يا خوي الظلم يعور الظلم ظلمات القبر
الله يكفينا شره نبي الحلم الديرة محتاجته بقوة
ربج الحافظ
وإن شالله الكل يفكر بحكمه وبمصلحة البلد
والحمدلله النواب كانوا قد المسؤوليه ووقفوا الندوات
والدور على الحكومه
وربج المستعان
ولا توقفين تفاؤل
هي الأوطان..
وعن أي وطن كتبت ما كتبت..
عن الكويت..
ترى آنا مافيني شدة للبجي ..
وقلبي صار له جم يوم يعورني ..
بس الله يسامحك..عطيتني أكبر من حجمي الحقيقي
وبعدين انا من الصبح اروح وارد عليك ..غطيت شوية لقيتك منزل بوست!!!
لا وحاش فيني بعد..يزاك الله خير ومرة ثانية لاتصيد على حجوة
قلت ما اصفف الحجي بس ساعات يطلع مصفف من نفسة
🙂
على فكرة ..مازالت البيوت منقسمة بين مؤيد ومعارض
اللهم الهمنا رشدنا
وارنا الحق حقا وارزقنا اتباعة
وارنا الياطل ياطلا وارزقنا اجتنابة
وهيئ لهذة الارض الطيبة امر رشد
وسخر لها خيرة ابنائها
اللهم آمين
الله يسامحج هذا والله أقل من قدرج
وشفتي محبتنا حق بلدنا تطّلع الكلام من قلوبنا
الله يوحد قلوبنا على مصلحة الكويت
وعلى فكره كلامج وايد أثر فيني وخنقتني العبره وآنا أقراه قلت أبجي أهل القلوب الرهيفه
وأحنن فيه أهل القلوب الجاسيه
حساباتك قوية….وقاتلة
تخيل وما إستخدمت إلا حاسبة التيلفون
حياك الله أخوي غانم منور مدونتي
قسم بالله العظيم انك هل ايام ياتحلطم قاعد تغرد تغريد في كتاباتك صج انك قاعد تقول الصج والصج يعّور و مايعجب الناس
مع احترامي حق الراي الاخر والله المستعان
خابرني ما أكتب بالسياسه
بس الأمور وصلت مرحله أصير منافق إذا تكلمت عن موضوع ثاني
أتمنى الهدوء والإستقرار علشان نرجع لمواضيعنا القديمه
وشوف موقع جنوب السره وتخمبق قوات الأمن
بعد السلام احب أن تستمر بالكتابة بشأن السياسي للأن الوضع الحالي يستدعي ذلك ولأن الاسلوب والطرح وربط الاحداث كشف لنا ابداعاتك السياسية مثل ما ابدعت بالرواية والشعر ( ولاتقول مو شاعر للأني ودي اسمع شي مستقبلا )
والله يالمتابع
الله يشهد إني ما أحب أكتب بالسياسه وإني مطلقها بالثلاث من زمان ولا أتابع لا حكومه ولا مجلس ومخلي السياسه لأهلها
بس في أوضاع مثل إللي صارت هاليومين الواحد يصير منافق ومنبّت الصله بقضايا بلده إذا ما تجاهلها
وإن شالله ما تشوف بوستات سياسيه ونرجع حق قطوتنا
ونكتب لك شعر على أمرك
وحياك الله يالقاطع
الله يكتب الي فيه الخير
اللهم آمين
ويحفظ لنا بلدنا