كثرت الأزمات والمشاكل لدينا لدرجة أنه من المناسب وصف هذا الجيل بجيل الأزمات,وكذلك وصف هذا العقد والذي يسبقه بعقدي الأزمات.تذكرت طنازة صديق عزيز على أحد الشعوب العربيه يقول سجّلوه في جينيس كأكثر شعب يخرج في مظاهرات.
وحيث أن العياب ورا الباب ,أعتقد أننا أكثر شعب مرّت عليه أزمات,ومسكينه كويتنا راح يقول عنها التاريخ بلد الأزمات والأسباب واضحه والقائمة طويله,سجل عندك:
-أزمة الأغذية الفاسدة
-أزمة البصل(الخيشه بدينار ونص)
-أزمة طماط(قمنا نحلف براسه)
-أزمة لحم (قبل رمضان وصارت صيحه بالجرايد)
-أزمة سمج(يوم أضربوا الصيادين)
– أزمة دجاج (سبقْت الأحداث وبتتذكرون كلامي عقب جم يوم
إذا شريتوا ديايه كبر البطه أو الديك الرومي-الطير وليس المطعم)
-أزمة الكوادر
-أزمة الكويتيه(خصخصتها)
-أزمة مياه(سنويا منذ خمس سنوات)
-أزمة كهرباء(أنظر عدد السنوات أعلاه)
-أزمة البورصه(وقبلها صارت جم مره من المناخ وإنت ياي)
-أزمة القروض (إسقاطها أو إسقاط الفوائد والرد الحكومي بصندوق المعسرين)
وخذ عندك مشاكل وأزمات سياسيه من الحين وقري(reverse):
– أزمة الدستور ورفع الحصانه
-أزمة طقة الجويهل
-أزمة غاز الأحمدي
-أزمة الجاسم والفضاله
-أزمة سكوب(إحاله للنيابه بتهمة التحريض على قلب نظام الحكم – سب -طق -شوشره)
-أزمة الإستجوابات
-الأزمة الرياضيه
-أزمة الدوائر ( برتقالي يبيها خمس وأزرق يبيها عشر ومرشح خيطان برتقالي وأزرق مع بعض)
-أزمة قناة جويهل (السور والثانيه مادري شسمها)
-أزمة البدون وأزمة المزدوجين(مو متأكد أزمه أو مشكله بس ورا كل وحده منهم أزمة)
-أزمة حل المجلس(عد وخربط)
-أزمة مجاري مشرف وتداعياتها(لا أقصد الخيسه ولكن التهديد بإستجوابات-لجنة تحقيق و خش تقريرهم بالدرج)
واضح من السرد تعدد أشكال ومسميات أزماتنا وتنوع مجالاتها.
وأرجو أن لا يُفهم من كلامي أنه نقد لأحد أو دعوة لوقف الأزمات والتأزيم فكلنا في قارب واحد ومتعتنا بالأزمات مشتركه ,يعني كلنا مكيفين ومستانين على الأزمات لاعبين ,وصانعي ألعاب, ومتفرجين.وبالإضافة إلى إعتيادنا على الأزمات فإنها تسلية للمواطن وموضوع حوارات خرطيه (إخت فكريه بالرضاعه)في الدواوين والمنتديات .
وغرضي من طرح الموضوع هو التنسيق والتخطيط فقط
يعني أتمني من المشكلجيه وصنّاع الأزمات التنسيق فيما بينهم لتجنب ظهور أكثر من أزمه في نفس الوقت.وأكرر لا تفهموني غلط ولا تعتقدون أن طلب التنسيق لمصلحة المواطن وخوفا على نفسيته إذا ظهرت أكثر من أزمة في نفس الوقت.
لا أعوذ بالله,بالطقاق نفسية المواطن ,ألزم ما علينا متعتكم يا أهل الأزمات.لكن طلبي بالتنسيق وتجنب أكثر من أزمة في نفس الوقت علشان نقدر نلحّق معاكم ونتابع الأزمات التي تبدعها إيدكم (يمالها الكسر)في الجرايد والتلفزيونات بتركيز ولكي لا تتشتت متابعتنا لجهودكم.يعني مو حلوه بحقكم تصنعون أزمه سياسيه كبيره وتضيع مع أزمة بيديان أو باجله.
كما أتمني ,إذا في مجال ,ترتبون جدول أزمات السنة القادمه2011 وتطبعونها في رزنامة العجيري لتمكين المواطن من الإستعداد والتحضير لها.
وختاما,أدعو الله أن يتقى الناس ربهم في بلدهم,
ويحمدونه على النعمه إللي أهم فيها ,والنعمه زواله,وتذكروا أيام الغزو الدنيا كلها ما كانت تسوى بيزه عندنا بدون الكويت .
T7l6m 
صح وصج ان العياب ورا الباب =\
لا تفاول على الدياي =( شنو أكل بعدين
صحيح كلامك .. اذا خلصوا الازمات ..
شنو راح اتحجون فيه بالدواوين او الفيس بوك او توييتر او البلوقات؟=\
راح يصفرون من الاوادم و الستاتس و البوستس
بلوقك بكره شراح يصير فيه ؟
اتهقى مع بدايه السنه الهجريه اليديده راح توقف الازمات؟!
او خل نعطيهم مهله او فرصه لي السنه الملاديه
اميين ياارب
و عفيه لا تقول تذكروا الغزوا لا تنسى البلوه الي طلعت لنا توها
و نسيت لا تحطها بين الازمات ..
مالت ” الدويله ”
ربي يرحم هالديره و اهلها
ما أفاول على الدياي يايه أزمته وتذكري كلامي
ولاتحاتين الأزمات ورانا ورانا لأن عندنا ناس عقولها فاسده وضمايرها معفنه ونيتها خايسه
الله يفكنا منهم ويكافينا شرهم
والبلوه بلوة الوطن وعبدالجليل والشرهه على العسكر إللي طاوعوه
أسف أحس حتى تعليقي مغثه
ليش …؟؟؟
عيب اصلا يخلون المواطن مالت علية من مواطن..يقعد بدون تفكير لازم يشغلونة بازمة عشان يتفرغون لعد الرزمه (فهمتها!!)
بس والله قعدت لي يمكن نص دقيقة افكر بهالجملة
” وموضوع حوارات خرطيه (إخت فكريه بالرضاعه) ”
وقاعدة اقول منو فكرية..
الله يسامحك..
اليوم تأريخ اكثر منه تحلطم
🙂
مشكلة المواطن يفكر غلط ويصدق حمير بمسمى خبير ويستنتج إستنتاجات (مثل ويهه)
أشوه فهمتيني غلط ولا البوست بالنسبه لي تحلطم من ام ام اللي اخترع التحلطم
وآسف مشورتج نص دقيقه مره ثانيه أحط شده فوق الطاء
منورتنا دوم
مع إنّي مالي بالسياسة وماحبها ،
إلا أنّي أستمتع بقراءة مقالاتك وتحلطمك ..
–
الله يستر من أزمات 2011 ..
حياج الله ويسعدني استمتاعكم
وان شالله نبعد عن السياسه
والله ما احبها ما وراها الا الغثا
ازمة منتصف العمر
صدقت… المفروض نمشي على تقويم يديد, الهجري والميلادي مو ملحق معانا يالله من فضلك
كل شهر له اسم عندنا, حسب تفاعل الشعب المضهولجي مع اي مشكلة
ترى زوغت قلبي بقهوة سميراميس, خاصة بالنهار, الشمس تضرب فيها بكل صوب, ليلحين خضرة؟
عليك بالعافية وثوبلي
اي والله صاجه نبالغ بكل شي بس لا تلومينهم شبعوا وبطروا
الله يصلحنا ويديم النعمه
الله يعافيج، وان شالله اثوبلج السفره اليايه لاني رديت
والظاهر من زمان ما رحتي ،غيروا الديكورات وظلموا الفندق حاطين فورميكا على كبر الممر
أخ تحلطم
اكبر تازيم بالدنيا حاليا حاصل
جيك عندك بتوتر و اسمع االبلاوي الي صايره بديوان الحربش حاليا
http://twitter.com/#!/busanad2020
http://twitter.com/#!/al_tariq2009
أدري سمعت عن اللي صار وضايق خلقي وحزين جدا
الله يصلحنا يارب ويحفظ لنا بلدنا ويوحد قلوبنا وينزل علينا سكينته
لا حول ولا قوة الا بالله
أزمة بيوت الظهر << بيوت الأشباح كانت من رواد الأزمات حبيت أذكرها واشملها
أزمة أم الهيمان << ما أدري شنو موضوعها بس جني سمعت شي جذي إذا تعرف عنها؟
أهم شي بالطقاق نفسية المواطن …
الله يعطيك العافية أخوي
و كل عام و إنت بخير و بصحة نفسية مواطن حديد وما يهزها ريح
أصلا عادي صار عندنا مناعه
مع الأسف يالجودي وانتي تكتبين التعليق صارت عندنا أزمه كبيره وخطيره
اللهم سلم سلم