T7l6m

يالله صباح خير
وبداية إسبوع سعيد للجميع,
وبعد الديباجه,
آنا بقول إللي عندي,واسمحولي,وكيفكم تأيدون أو تعارضون ,بس إقروا لي آخر سطر قبل لا تحكمون
الخصخصه توجّه فاشل وعندنا بالكويت فضيحه.
اول خصخصاتنا كانت بيع الشركة الكويتية لصناعة وتجارة السيارات ,الوكيل الحصري لسيارات B.M.W.رغم إعتراض مساهميها من القطاع الخاص.
ومن خصخصاتنا إللي ماعجبتني أمريكانا,
سنة 1993 طلب المساهمون في الشركة من الحكومه بيع حصتها لهم,يعني لا تييبون لنا ناس في الشركه مانعرفهم ولاّ تأذّونا مع المواطنين.
وقررت الحكومة بناءا على “رغبة “المساهمين (كلمة الحكومه ,مو منّي)بيع حصتها,وشوفوا شلون:
البيع بسعر 200 فلس للسهم محملا بأرباح قدرها 80 فلس .يعني السهم ب120 فلس ومو بس جذي ,و يقوم المستثمر (الشاري)بسداد قيمة الأسهم على 3 دفعات……..لااااااااااااااا تعليييييييييييييييييق.

ولا يفوتني خطة خصخصة الكويتيه والسعي الحثيث لإفراغها من الكويتيين.كما لايفوتني التذكير بما تم ويتم في قطاع الإتصالات الكويتي عندما إستحوذ القطاع الخاص الكويتي عليها فأصبح لدينا شركة قطريه وإحتمال إماراتيه والحكومه عطت الثالثه للسعوديه.
الحكومه أيضا عندها شغلة ال B.O.T يعني بناء,تشغيل,وتحويل .يعني القطاع الخاص يبني المشروع ويشغّله وبعد مده يحوله للحكومه.ومن هالمشاريع مجمع المثنى ومستثمره بيت التمويل.إللي صار أنه بعد تحويل المجمع للدوله بعد المدة الزمنية المتفق عليها(25 سنه)قررت الحكومه تكليف مستثمر آخر بإدارة المجمع,حلالها وكيفها,طلع مو كيفها وبيت التمويل جرجرها بالمحاكم والله العالم شنو حكم القضاء.
ال B.O.T حاليا مشاريعه تضحّك و تفشّل ,في آن,وآخرها بناء مقر الوطنيه للإتصالات في مواقف مجمع الوزارات.

وحيث كذلك,لماذا لا نتبع نهج إقتصادي ,وتنموي, وفكري جديد كبديل لخصخصتنا الحاليه:شعببه.يعني تحويل المؤسسات والموجودات الحكوميه للشعب بدلا من تحويلها للقطاع الخاص إللي يعاني حاليا من مشاكل في سداد ديونه للمصارف,ومن إنخفاض في قيم أصوله ,ويقلص نفقاته بتسريح الكويتيين ,والذي تسيّره مصالحه الخاصة والرغبة بتعظيم الأرباح دون النظر للصالح العام(وايد راح يعترضون على الفقره,يمونون).
أدري بعضكم راح يقول خل نفككها ونبيعها ,قصدهم الكويت,طبعا مو هذا قصدي .آنا أقول كل هالمؤسسات والشركات والبنية التحتية من أموال الشعب وللشعب فليش تروح حق مجموعة صغيره عندهم القدره على الوصول للتمويل ويشترون حلالنا وما ندري الحكومه شلون راح تتصرف بعائد البيع(ماعندي ثقه بحكمة التصرف ومو محتاجه الحكومه فلوس زياده الله يسلم النفط برميله ب 80 دولار وعليك الحساب ياللي ماتضيّع)

آنا مو بصدد وضع خطة متكاملة للموضوع لكن أقول الشعب مستثمر نظرته بعيدة المدى(لا تخلونه يبيع صرفوله العائد إذا تحقق),والشعببه وسيلة لإعادة توزيع الثروه(مو الدخل),ومافي أي مضّره للقطاع الخاص(الله يزيدنا وياه ويغنيه),ويعطي للحكومه مرونه في الإداره,وتضمن بقاء أصولها بيد مواطنيها,وتعزز مستوى دخل المواطن,وترفع أسهمها عنده,وتفتك من صيحة النواب إذا تبي تخصخص شي.
وأتمنى كلنا نقول نبي شعببه ماتصلح لنا الخصخصه.