لغتنا غنيه ومفرداتها كثيره.والمفردات أنواع يعني مثلا هناك الأزواج (مذكر و مؤنث)مثل زوج وزوجه,ولد وبنت,حبيب وحبيبه,كلب وكلبه.وعندنا الشيء ونقيضه مثل ليل ونهار,أبيض وأسود,شاطر وكسلان,طيب ونذل.
اليوم من الصبح مادري شفيني على الكلمات إللي تكمل أحدهما الأخرى يعني إذا سمعت وحده منهم حتما ولزاما تتبعها الثانيه.وأذكر أيام الدراسه علمونا السلع المكمله لبعضها(complement)ويقولك إذا زاد الطلب على وحده يزيد الطلب على الثانيه مثل القهوه والمبيّض وهي عكس السلع البديله وإللي إذا إرتفع سعر أحدها يقل الطلب عليها ويتحول للسلعة الأخري .
جولتنا مع هذه الكلمات المتممه لبعض و مألوفه عندنا(ولا تدققون وايد لغويا,وإقتصاديا):
من الأكل:عيش ومرق,نخي وباجله(مع أن المحلات قامت تبيع آش),بطاط وبيديان,تكه وكباب,جباتي وجاي حليب,معبوج وأجار,ملح وفلفل,برتقال وتفاح(من بد كل الميوه),ثوم وبصل,رويد وبقل,بقصم ودرابيل,حمص ومتبل,باجه وكراعين(100%كوليسترول),حب وفستق(دايما مطوفين الكازو),هريس ويريش.
الملابس:غتره وعقال,مكسر وفنيله(ويمكن إستبدال الأولى بصروال),شورت وتي شيرت,جوتي ودلاق,نعال ومداس,,ونسائيا بلوزه وتنوره,حجاب ونقاب,نفنوف وعباة (والله أعلم).
منوعات:باطنيه وجراحه,شامبو و كونديشنر,سجاير وولاعه,شعر ونثر,صحافه وإعلام,الجزيره والعربيه,بيت وشقه,إسهال وإمساك,رأي ورأي آخر,فيرست وإكونومي(مطنشين البزنس),أنف وإذن(كنسلهم لازم الحنجره رازه الويه).
كويتيا:عطله وسفر, ويك إند ومول,ريال ودوانيه,حريم وسوق,معارض وحكومي,زياده وكادر,زين ووطنيه(فيفا داشه بقوه),العراق وإيران,واسطه ومحسوبيه,مرور ومخالفه,سرعه وكاميرا,إيكيا وموذر كير,أرض وقرض,الجزيره والوطنيه(الكويتيه مستقله بذاتها),حكومه ومجلس,شاليه وياخور,دراسه ووناسه,طفاسه ونحاسه,ستار بكس وكاريبو,مصاخه وملاقه,دوام وعرضي,بَنَكْ و نقل,القادسيه والعربي(مع الإعتذار لباقي الأنديه),جاي ولقاح,رهش وخبز(مسمسم),معاش وأقساط,ماي وكهربا,ينّي وعطبه,سبيكه وعبدالرحمن(ماقصّرت خذِته),آي فون وبي بي (جالاكسي ينافس ويقول أحمد له مستقبل),أسهم وعقار(الله يرزقنا وياكم),جيب و وانيت,إسلامي وربوي,نشله وكحه,بواق وحرامي.
وتنفرد لهجتنا بدمج الكلمات والأرقام مثل,صينيه وست قلاصات ,والرقم 16 مع الكلب.
وختاما,ياريت إللي يعرف يفتينا بأسباب ربط الحمام بالأدب!!!!!
الموضوع معقدني منذ طفولتي وكنت أقول المفروض يسمونه “قلة أدب”.
T7l6m 
ظلمت الدرابيل و القرص عقيلي ، اما بالنسبة لعلاقة الادب في الحمام ، فهو التأدب بالتستر عند قضاء الحاجة.
يعطيك العافية !
الله يبعدنا عن الظلم وحتى لو ظلم الدرابيل
وللحين مو مقتنع بسالفة الأدب
ليش يقولون رحت الأدب؟
ليش مايقولون رحت أتأدب ؟
الله يعافيك
وحياك الله وفقدنا تعليقاتك
مت مت من الضحك
على كل نقطة وكل تعقيب بين قوسين
الله يقطع ابليسك
أما الرقم 16 مرتبط عندنا بالكويت مع كل شي
وسالفة الأدب تصدق اني سامعة لها تفسير بس نسيته!
ادعيلي أتذكر 🙂
آنا قلت الجمعه مانبي نغثكم ،والحمدلله عجبكم
آمين تتذكرين ويمكنك الإستعانه بصديق بس نبي نعرف السر
قصدي نتأكد من تفسير حمد
والرقم ما عرف إلا هالإرتباط
حياج الله
أسعدها مروركم
الله يسامحك…
انت لا تقعد تفكر واااايد تودرنا …
بس خوش ثنائيات خليني افكر بعد باشياء وايدة
عندك..
بر وخيمة
بحر وشالية
شفر والغانم
مرسيدس والبشر(مطنشين الكاظمي)
مرقوق وقبوط
معدس ومموش
وبعد فية بس نكتفي بهذه المساهمة بالوقت الحالي
🙂
الله يسامح الجميع
المشكله من حطيت هالمدونه والتفكير ذابحني فتوقعي أودركم
تسلم إيدج على المساهمه القيمه مادري شلون طافوني
خليناج تفكرين وايد !
هههههههه
مت ضحك من قلب
🙂
قواك الله
الله يقويج والحمدلله عجبكم البوست
إن شالله السياسه اليديده ،الويك إند خفايف
حياج الله منورتنا
حلو ورهش
مو رهش و خبز امسمسم
لبن وروب مع إنهم نفس الشي بس ما ادري ليش اسمعهم عندنا وايد مترادفين
تمر و هردة و احسب الوزن
حبيت الكويتيه المستقلة ربي يوفقها و ترد أقوى من الأول
وسباجة إلي ما قصرت و خذت عبد الرحمن وجنه عبد الرحمن كان ضايع و إهي لفته
و الرابط بين 16 و الكلب وايد محيرني ؟!!؟؟ ودي أعرف اشمعنى 16 ؟
تحلطم
اليوم اتوقع شاركتك التحلطم بضمير 🙂
سوري على الإطاله
عساك على القوةأخوي
إسمحيلي يالجودي اخالفج بالرهش
واضح ان الكلمات مرتبطه بالبيت وايد مثل ماقلتي عن الروب واللبن
وحيث أن مكانة الرهش عندنا كبيره فله تصنيف مستقل عن باقي الحلويات(حرصي على الوطن وخلج من الشمالي)
التمر والهرده بطلنا عنه من مده بسبب المحذور اللي ذكرتيه
واتمنى مثلك للكويتيه التوفيق وفعلا إهي مستقله
وسبيجه وعبدالرحمن أكيد ماذكروها عبط، ليش ما أدري؟بس فعلا ماقصرت
وختاما آسف على الإطاله وشكرا على التحلطم بضمير حى
حياج الله ولاتباعدين
وهناك متلازمة اخرى: انت والابداع
شكرا لك
حياك الله يا بن محمدي
فقدناك
مالك أي نشاط من بعد الطاولة تك تك تك،عسى المانع خير
مشكور وايد على كلامك الحلو وأتمنى من كل قلبي أن أقترب من مستوى الإبداع
حياك الله منور مدونتي وخلك جريب
نسيت اهم متممات
تحلطم وتقرطم
🙂
شياب ايكيا حق مذر-كير؟ يديدة علي!
اما 16 مع الكلب حاشاك فمحللتها وخاصة اذا اخذتلي دورة بشبه منحرف الشيراتون -دوار الشيراتون سابقا-
اول ماطرى علي ثنائيتج فكرت فيها وهونت
أحد أييب الكلام حق نفسه
يمكن المحلين معقديني
أشوه آنا مركز على الخوخه وابن الرقيه إذا عصبت بالشارع
حياج الله ومنورتنا
الله يونسك بالعافية
صج صج .. بوست شرح
مادري ليش احنا شعب نحب التحلطم ؟
حتى تحلطمنا غيـــــــــــــــر P;
صبحك الله بالنوير..
صبحج الله بالخير
الحمدلله عجبكم وإن شالله يعجبكم بوستنا الجديد
حياج الله
أسعدتم صباحنا بالتعليق اللطيف