ليش مستوى الحوار بينا صار واطي.وما اقصد حوارنا الخاص في الدواوين او القهاوي لكن على صفحات الجرائد وشاشات الفضائيات والحوار العام .
امس دخلت على القبس اونلاين قريت مقاله وقلت بعلق.قريت التعليقات واللا الله لا يراويكم كلام منحط،اللي يعلقون يتطنزون على بعض،ويسبون بعض،وكل واحد يطلع علوقه على الثاني.الغريب في الموضوع ان الجريدة فاتحه أبوابها للوقاحه دون اي تعليق منها او تصحيح لمعلومه او حتى كلمة “واللي يرحم والديكم شوي شوي على بعض”
كلامنا مع بعض،او اللي نوجهه للآخرين يفتقد اللباقة والأدب واحترام الجمهور جنه قول اللي عندك، واحم احم، طز بالباجين.
زملاء وإخوان يتكلمون عن شخصيات عامة باسلوب والفاظ لا يستخدمونها مع قسوم راعي الدكان.اذا الكلام بالدواوين كيفكم لكن في وسائل نشر عامه على الاقل نلتزم باسلوب يخلو من التجريح والاسفاف اذا كان غرضنا وهدفنا هو الاصلاح لكن يبدو ان الهدف هو الكلام والحط من الاخر .
بذمتكم اذا هذا اسلوبنا تعتقدون تصلح لنا الديموقراطيه؟
ما ألوم بوبدر يوم قال :إحنا مو كفو الديمقراطيه!
تلومونه؟
T7l6m 
المفروض يشيلون التعليقات
حتى عالوفيات يعلقون, الحمدلله على نعمة الفضاوة بالعقل
والا واحد متوفي شماله ثمانين تعليق تحت اسمه؟
صح كلامج و أؤيد الغاء التعليقات
وتوني ادري في تعليقات على الوفيات
الحمدلله
التربية
ابحث عنها شوف كل واحد اشلون تربى و شنو بيئته
أتمنى لك نهاية اسبوع سعيده و بدن أي غلط يكون كله صح 🙂
نهاية اسبوع صح ويعيده لج وللجميع
البيئة والتربيه الأساس لكن تلاحظين تعصب شديد وحماس كبير بدون منطق او موضوعيه
الله يهدي الصغار ويصلح الكبار”قدواتهم”
وحياج الله
من زمـــــــــــــــــان احنا مو كفو الديمقراطيه
المشكله في ناس تستغل هالاشياء و تكون وقحه الى ابعد الحدود
و اهيا مرتاحه ومطمنه لانها منخشه تحت اسم مجهول ومستعار
و بعدين من الفظاوه و التفكير السطحي جدا
الله الهادي
happy week end 🙂
فضاؤه وتفكير سطحي أكيد
بس راح عن بالي موضوع الجبن والتستر بأسماء وهميه،صح كلامج.
Same 2 u
حياج الله
تصدق السؤال هذا محيرني من زمان
ليش هالمستوى بالحوار؟
حتى الوطن لا تشوف تعليقات القراء .. بدال لايعلقون عالمقال يعلقون على تعليقات بعض !
مثل ماقالت حديث الفجر كل واحد مطمن تحت اسمه المستعار
بس السؤال اهني:
لهدرجة فينا حقد ورغبة في قول كل كلام سيء ف نرتاح مع الأسماء المستعارة و”نفضفض” بالسب والتجريح؟؟
المشكله هي تعليقات القراء علي بعض وتجريحهم في بعض
وسؤالك يجر سؤال اخر:
حقد من على من؟
حسبي الله على من فتت الكويتيين ويسعى لنشر الفتنه بينهم
التعليقات اللي قريتها تعكس احتقان وحساسيات بين فئات من المواطنين وهذي فتنه بحد ذاتها
الله يصلحنا ويحفظ لنا بلدنا وبدونها ما نسوى بيزه
بس باريت الكل يفكر بالغزو ويعتبر
صح..
كلامك كلة عدل
بس انت تهقى ان احنا مو كفو ديمقراطية؟؟؟
انا اهقى..
لأن الدول المتقدمة ديمقراطيتهم ناقصة
فما بالك بقوم عمك وخالك وخشمك وراسك…
يازين زمان يدي وابوي..
الحشيمة يا تحلطم اسلوب كامل للتربية
اعتمدها مع نفسك قبل الناس وشوف شيصير؟؟؟
صراجة أفحمتيني بالكلام عن ديموقراطية الدول المتقدمه .أأيدج فيه
و أأيدج بأن الحشيمه أسلوب تربيه
والإسلام يحثنا على التحدث بأدب .الله سبحانه لما كلف سيدنا موسى وهارون عليهم السلام يروحون حق فرعون أوصاهم أن يقولا له قولا “لينا”
والرسول عليه الصلاة والسلام قال”ماكان الرفق في شيء إلا زانه,وما نزع عنه إلا شانه”.وتوجيه الله له”إدعو إلى سبيل ربك بالحكمة والموعظة الحسنه”
بس مافهمت آخر جمله ؟؟؟
حياج الله
لا والله ما ألومه .
من الفظاوة تشوفهم يعلقون على اللي أكو واللي ماكو ،
أما سالفة الأسلوب المنحط أعتقد البيئة لها تأثير كبير بهالشي .
و Happy Weekend =D
وياريت التعليقات فيها خير
وإذا فاضين يفتحون كتاب أو مجله أو يدخلون مواقع مفيده أحسن لهم
ومافي شك البلوه بالبيئه لكن البيئه كبرت وتجاوزت البيت والأهل والمدرسه إلى التلفزيون والإعلام والبلد بكبرها
happy weekend 2 U
منورتنا وحياج الله
اللي قصدتة …
ان الواحد لي حشم نفسة يلقى الحشيمة..
اللي ما يتدخل بالامور اللي مايفهم فيها ما يسمع كلام يغثه
اللي يترفع عن التفاهات يعيش عاقل..ورزين
لحية احشمها ولحية احشم نفسك عنها
وسلامتك..
اتمنى اكون وضحت لك قصدي
واضح جداً
للمشكله هالأيام تحشمين الناس وماتلحقين راس
فما بالك بدون حشيمه
الله يسلمج
لاوالله صج محنا كفو ديموقراطيه
يا حيا الله حب شمسي
شدعوه محاربنا،من زمان ما طليت علينا
شلك بالسياسة والديموقراطية
بس حيث إني ديموقراطي أحترم رأيك و أأيدك على خفيف