يقولون إن وزارة التربيه كان إسمها وزارة التربيه والتعليم لكن قرروا تغيير الإسم وإلغاء كلمة التعليم لأن التربية هي الأهم.
آنا أقترح ,ولو آنا عضو جان طالبت وبشده ,تغيير الأسم إلى وزارة التعليم والمبررات موجوده:
*الوزاره حاليا ما تربي ومالها علاقه بالتربيه إلا بالإسم فليش نعطيها إسم ما يركب على إختصاصها.
*المعلمين والمعلمات قاموا يسمونهم المربي والمربيه الفاضله مو ناقص إلا يلبسونهم مريول نظيف وهذا لا يليق بهم.
*التسميه الصحيحه للوظيفه هي وصف لطبيعة تلك الوظيفه .وفي حال تحديدها بدقه يمكن صاحبها يفكر يمارسها .يعني إذا سميته معلم أو معلمه يهتمون بالتعليم أما حاليا فمعظمهم,إسمحولي ,ما يعلمون ويعتقدون إنهم يربون وهم أيضا ما يربون.
*إلغاء كلمة التربيه وإستبدالها بالتعليم يزيح عن كاهل الوزارة مسؤوليه أدبيه مو قدها و يخرجها من مأزق أوقعناها فيه ,وبالتالي تخلي مسؤوليتها عن السلوكيات السلبية في المدارس وعندها المبرر “آنا مو شغلي التربيه ,آنا حدي أعلم عيالكم” .
*إلغاء كلمة التربيه يحمل الأسر إللي مو مهتمه بعيالها مسؤوليه أكبر وما يصير لها عذر إنها ما ربت عيالها تقول شمهنة وزارة التربيه .ونقدر كمجتمع نقول لها ديروا بالكم على عيالكم ترى الوزاره بس تعلم و مالها شغل بأي شي ثاني .التربيه عليكم يا أهل.
*تغيير مسمى الوزارة يحدد أسم من يعمل بهذه المهنة ب”معلم” بدلا من التسمية الضايعه حاليا بين مربي,و مدرس ,ومعلم ويعطيه وقارا أكبر فهل سمعتم “بمعلم خصوصي” .
* مهنة مربي بدعة كويتيه حتى جوجل يأيدني .نتائج البحث كما يلي:
_ معلم 11 مليون نتيجه.
_ مدرس 7 ملايين نتيجه.
_ مربي مليون ومئتين ألف (بما في ذلك مربى رقي و مشمش) .
وفي الختام ,أتمنى من المعلمين أن يُعلموا ويتقوا الله في عيالنا.
تخيلوا “مربية” ولدي للرياضيات مصلحه له كتاب التمارين وحاطه على كل الإجابات صح وفوقهم نجمه,مع إن نص إجاباته غلط .يعني حضرتها مو بس ماتعلم لأ تخربط مخ الياهل بعد.
وتلومون أولياء الأمور,إذا تحلطموا .
T7l6m 
وجهة نطر,بس انا باقول ملاحظة وحدة الطفل او الطالب يقعد بالمدرسة تقريبا اكثر ما يقعد بالبيت وبالتالي,تاثر الطالب بالجو المحيط فية بالمدرسة كبير,ومدى غرس المعلم بالطالب من تعاليم واخلاقيات تصقل من شخصيتية,نحن نتمنى ان يكونو مربين لكن الواقع غير ذلك للاسف,وتحياتي
صح كلامك ,الطالب يقضي وقت طويل بالمدرسه لكن المشكله ماشفنا نتيجه من هذا الوقت الطويل
لا اليهال تعلموا عدل ولا تربوا,إلا من رحم الله.
ومنورنا يالنجري
حياك الله دوم
يا معود
ما نبيهم يربون عيالنا
انت شايف جيل المدرسات اللي الحين
هذولي بروحهم يبي لهم تربيه ودروس بالتعامل والأتيكيت
يعني تأييدين
إنهم يتفرغون للتعليم
إذا تفرغوا!
حياج الله
أأيد
وبشدة
لأنهم صج ضايعين بالطوشة
ف خل يستقرون على شي واحد يطبقونه أحسن من مليون شي مايتطبق
لأ .. مانلومكم ياأولياء الأمور .. تحلطموا لين ربي يفرجها
🙂
لا توصين على التحلطم
بس ماننلام
حياج الله
و اخيرا وصل دور التعليم ، و ما ادراك ما التعليم ، تكفا و اللي يرحم والديكم شوفوا المناهج اللغة العربية كلها بدليات و التربية الاسلامية ماكو مواضيع للدروس اية و حديث و الطفل لازم يعرف و التربية الوطنية تقول الغاز
و اذا تبون ازيد ابيكم تزورون كلية التربية الاساسية في الهيئة العامة للتعليم التبطبيقي و التدريب و شوفوا بعيونكم
و الحقيقة انها لا وزارة تربية و لا تعليم
قم للمعلم و وفه التبجيلا كاد المعلم ان يكون رسولا
المشكله
شفت المناهج إللي تنتقدها هم مايدّرسونها عدل
ومثل ماقلت فلسنا من التربيه ومن التعليم
وإسمحلي بيت الشعر مايركب على واقعنا
لأن ماعندنا معلمين.عندنا مربي ومربيه!
وحياك
اي والله خلو لنا التربية الله يرحم والدينكم
وعلموا عيالنا صح..
الكويتيات شنقول وشنخلي(طبعا موالكل حتى لا اظلمهم )
وباجي المدرسات الحين من جميع الجنسيات
انا بنتي تحتاج مترجم حق ابلتها الرياضيات لانها مغربية
وابلتها الاجتماعيات صعيدية وما تعرف حتى تتحجى مصري
وابلتها الانجليزي مصرية( طبعا كل كلامها بدليات وغلط)
و..و…و..
فتحت الجربة يا ابن الحلال خلنا ساكتين
والله انا عن نفسي ما اخلص..
بلاوي…
تحياتي لك
أولا عيدج مبارك
ثانيا وين النشاط هالأيام كتبتي عن الجيكره والمنظره(قصدي المرايا) ووقفتي عقبها
ثالثا نسيتي إنج موصيتني (حيلك بالتربيه)وزيتنيني عليهم وآنا مو ناقص
على المدرسات عندنا وعندج خير كلهم جذي
أسعدنا مرورج ولا تباعدين