Statuses

أي خصخصه أي بطيخ

In أخلاقيات, إقتصاد, عام on 18/11/2010 by t7l6m مصنف:

وين ما أقولبها ماتركب
كثر ما أفكر فيها ماتدش المخ
ودك تمنطقها،مالها منطق
ليش؟ وشالفايده؟ و بشنو تنفعنا؟
مافي جواب

هذي حدود حيرتي بخصخصة الكويتيه
وبحكم أن المؤامره بالنسبه لي عمليه ،مو نظريه
أقول بكل ثقة وقناعة أن السالفه فيها إن أكبر من الجامبو
وريحة خمامها ،على قولتهم،تزكم الأنوف لا وخيستها تصك على ريحة شرق بيوم رطب

وصلتني معلومه من واحد واصل إن تكلفة تنظيف الكويتيه من موظفينها فقط 120 مليون دينار
صراحه ,طقيت على راسي من الرقم
وعلى طول طرت علي هالأسئله(الطقه قويه الظاهر)
ليش تدفع الحكومه هذا المبلغ؟
وشنو راح تحصل عليه في المقابل؟
وماهي البدائل الأخرى؟
وشنو عيوب ومزايا بديل الحكومه الحالي؟

المبلغ يساوي 420 مليون دولار يعني نقدر نشتري فيه ,نقدا مو أقساط,على الأقل 5 طيارات (AIRBUS 320) أي ما يعادل أسطول نقدر نشغل فيه شركة طيران صغيره(الجزيره إبتدت بطيارتين وبعد 6 شهور طيارتين غيرهم) وبالتالي يمكن أن يكون المبلغ وسيله لتجديد الأسطول مع حصيلة بيع أو تأجير طياراتنا الداثره.
السؤال الأهم ليش يبون يفرغون الكويتيه من الكويتيين,وكيف يتسني لبلد يعشق أهلها السفر أن يخْلوا قطاع الطيران فيها من مواطنيها.شنو الحكمه؟لا تفكر بالجواب لأنه لا يوجد جواب منطقي.
نفترض الحكومه دفعت 120 مليون ,ماهو المقابل المتوقع؟
أبسط تفكير تجاري,تفكير راعي بقاله,يقول إذا بدفع دينار لازم أحصل بالمقابل علي أكثر من دينار وإلا فلا.والمنطق يقول أن من فكر بالتخصيص لديه دراسات تثبت أن دفع 120 مليون سيرفع من قيمة الكويتيه بأكثر من ذلك عند خصخصتها.
آنا أتحدى,أقص إيدي إذا عندهم دراسه عن أثر تفريغ الكويتيه من موظفينها.وبيني وبينكم الساطور.
إنزين,حكماء الخصخصه ليش مافكروا في بديل آخر,مثلا ليش ما يكون العقد مع المستثمر يضمن عمل كافة الموظفين الحاليين لمدة خمس سنوات وبالتالي تخفف الحكومه من إلتزاماتها الماليه وتؤجلها وقد يتبين إحتياج المستثمر للكفاءات العاملة في المؤسسة ويقرر إستمرارها في عملها.وهذا البديل يجنب من له خدمة طويلة في الكويتيه التقاعد المبكر.
وختاما,إذا كان هذا التوجه في أول عملية خصخصة كبيرة في البلد وهو طرد الكويتيين من أعمالهم لخصخصة جهات عملهم فهذا يعني ان الكويتي سيرتاح في بيتهم ولن يعمل إلاحسب أهواء المستثمرين أي في ظروف سيئه وبراتب قليل .
وإذا هذا التفكير,بشروا يالكويتيين بمستقبل مظلم.مع الأسف.

على فكره صاحبنا الواصل مشهور بكثرة إستخدام مصطلح corruption إذا تكلم عن الكويتيه.بس مادري شنو قصده!

الإعلانات

4 تعليقات to “أي خصخصه أي بطيخ”

  1. أقولك شي

    الكويتيه فيها كفاءات قلة وجودها في أي قطاع حكومي

    ناس تشتغل من قلب و قلبها على البلد لكن للأسف وين إلي قلبه عليهم

    غالبية الكوادر إلي فيها توجهم راح يكون للعمل الحكومي …

    قرار الخصخصة وضع أمام الموظفين الغير مستحقين لتقاعد الخيار ما بين العمل تحت مظلة المستثمر لمدة 5 سنوات أو العمل في الحكومه مع الحفاظ على كافة مميزاتهم ورواتبهم
    و الغالبية اختاروا الحكومه خصوصا إلي في أرقابهم أسر و مسؤوليات يقولون لك الحكومه اظمن لأن المستثمر بعد 5 سنوات يقولي اقضب الباب و لا يخفض راتبي بسبب الأزمة الأقتصادية و وضع السوق فيقولون ليش أحط مستقبلي وقوت عيالي بيده و المشكله إن هذا كلام مهندسين طيران و فنيين طيران و وظايف متخصصه في مجال الطيران … و خبرررررررة و كفاءة

    و يقولون الكويتيين ما يشتغلون كا إلي يشتغلون شنو خذوا عوار قلب يا أخوي خلها على الله ربك كريم ..

    و موضوع الخصخصه كشة ضايعه

    • مو قلنا السالفه فيها (إن) ولا مهندس طيران شنو يشتغل في الحكومه
      وما في شك أكو كفاءات وناس تشتغل وهم اللي الواحد يضيق خلقه علشانهم
      كله على الله
      وما بإيدنا شي إلا التوضيح والنقد للصالح العام

  2. سالفة الكويتية هذي سالفة
    مصييبة !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: