Statuses

للزغالة وجوه

In أخلاقيات, إقتصاد, عام on 14/11/2010 by t7l6m

النحاسه إذا تكاثفت و تجمعت مثل الغيوم السود شنو تمطر؟
زغاله؟
خابريني أحب البنوك وايد (هيّن،علينا)
وأقدر دورهم في خدمة الإقتصاد والمواطنين (طل بعينهم)
وحرصهم على أموال المواطنين والتخفيف عنهم (أنظر بنوكنا وصمونة الفلافل)
وإحترامهم لموظفينهم وتقديرهم عند التقاعد (أنظر مصاصي الدماء)
وإستمرارا لنحاستهم مع الموظفين المقاريد إللي يشتغلون عندهم

قرر إتحاد المصارف الطلب من البنك المركزي مادري مجلس الوزراء إستثنائهم من قرار مجلس الوزراء بتحديد العطلة الرسمية للبلد بمناسبة الوقوف في عرفه وعيد الأضحى المبارك

طلبوا إن موظفينهم يداومون اليوم الأحد من بد كل الوزارات والشركات والمؤسسات في الكويت،والشرهة على إللي وافق لهم بدون لايفرض عليهم صرف بدل عمل إضافي للموظفين

البنك المركزي ،مثل ماشوف، مدلع البنوك ومعطيهم الخيط والمخيط ،بل(حلوه بل)،ماخذ فيهم مقلب ومصدق إن لهم دور في التنمية وبالإقتصاد مع إني أشوفهم(punch of )
مجموعة من المترزقين والمرتزقين على ظهورنا

راح يقول بعضكم :وليش شاب عليهم لأنهم داوموا؟
أقول من الآخر لأنهم جمبازيه، وبلاعين البيزه، وما يطوفون الفلس،
أنتوا:ليييششششش؟
آنا:إذا كانت كل الكويت معّطله يعني مافي شغل من الوزارات والشركات
البورصه مسكره
البنوك العالميه ويك إند
البورصات العالميه وأسواق المال الدوليه عندها عطله
إذا بنكنا المركزي(المصرف مو الجيله بربع) زات نفسه مأفول
إذا آنا وإنت لي الضحى العود مكّبرين المخده،يعني حتى زباين ماكو

ف ليش،ولماذا ،و شحقه إنتوا مطلعين موظفينكم من بيوتهم ولا مخلينهم يحدرون من الشاليه أو المخيم،أو الجاخور،ولايغيرون خططهم مع أسرهم؟
ليش يداومون إذا مو لعانه ونحاسه وجعصنه وحاسبين شكثر توفرون إذا الموظفين خذوا إجازات من رصيدهم بدل الإجازة الرسمية للدوله
وفي الختام أذكر البنوك شنو صار بمال البخيل و شلون كلاه العيار ولكم فيما حصل في بنك الخليج وبنك بوبيان أسوة حسنه
ولا يفوتني أقول لموظفين البنوك:قلعتكم ليش ساكتين حق معازيبكم
وين نقابتكم حظي؟

Advertisements

6 تعليقات to “للزغالة وجوه”

  1. هههه اي والله وين نقابتكم ياحظي…

    لك طرح مميز في القضايا..
    يخليني أقرا الموضوع كامل من غير ما اطوف سطر…

    انت رائع اللهم بارك

    وعساها اجازة سعيده للي مأجز
    ..وللي يقول لاااااا بعالي الصوت للمعازيب

    بس ترا انا اول العيد خفارة:)

    قلت لا والا ماقلت..رضيت والا انرضيت :)) راح اداوم..لا وبرضى النقابة وبرضاي بعد

    🙂 يامسى الورد

    • شكرا دكتوره على الكلمات الطيبه
      والرائع هو ذوقج
      عيدج مبارك وإجازه سعيده
      وخفاره سعيده وخفيفه وجزاج الله خير والله يعينج على وظيفتج
      إحنا إجازتنا،الله يعز الحكومه ويصلحها،كامله ومومحتاجين نقابه

      ومساء الهنا
      ومنورتنا

  2. صج صج صج بوست تحلطم من عرج عرجه

    و كله جهة و وين نقابتكم حظي جهة ثانيه

    بس ترى هقوتي بيعطونهم

    لا تضيق خلقك هم راضين ليش منقث …

    المهم إنت مستمتع في الإجازة ومكبر المخدة

    صباح الطاعة و العبادة

    • شكرا الجودي
      الظاهر لاحظتي مثل مالاحظت إني مخفف تحلطم هاليومين
      فقررت أن يتوافق الطرح مع عنوان مدونتي
      يعني ماأوقف تحلطم
      تحملوا
      بعدين إللي حارني البنوك كثر ما ياخذون يقولون:هل من مزيد
      فلا تتوقعين يعطونهم شي،وتوى الربع يسولفون بالدوانيه إن عاشور مال نقابتهم محتج
      وموظفينهم كيفهم يتحملون
      إحنا مكبرين المخاد وآخر كسل

      مساء السحور والدعاء المستجاب

  3. ما ادري شقول غير
    حراام =(

    ولو انا منهم اكييد ايجازه حتى لو على حسابي
    اصلا اجابل منو الكل معطل ؟؟

    الله يكون بعونهم =\

    • الحركه مقصود علشان الموظفين ياخذون إجازات من رصيدهم
      رفيجي مسؤول في بنك يقول من 22 موظف عنده 17 خذوا إجازات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: