لو أسأل: منو المسكينه،ومنو المساكين؟
الإجابات راح تختلف والكل بنظره في مساكين وفي مسكينه
ويمكن سيتفق كثيرون بأن المسكينه هي الكويت إللي إبتلشت فينا
لكم حرية إختيار مسكينتكم ومساكينكم،لكن موضوعي اليوم المسكينه مقصود فيها الكويتيه
ولا تروحون بعيد وتستانسون يابنات أمنا حواء،ترى مو قصدي إنتو
الكويتيه =الخطوط الجوية الكويتية
مسكينه الكويتيه كانت من أفضل خطوط الطيران في المنطقه وكانوا جيرانا إذا يبون يسافرون ويكشخون يطيرون من الكويت.الحين إنقلبت الآيه تشوف الإتحاد والإماراتيه والقطريه تشحن ركاب من الكويت معظمهم رايح أبعد من أبوظبي و دبي و الدوحه رايحين أمريكا وأوروبا وشرق آسيا.
كانت طياراتها أحدث الطيارات ومحطاتها منتشره وخدمتها زينه .و ما أقول إنها كامله لكنها كانت جيده وبكل ثقه أقول كانت أفضل من الحين “بدبلات”.
شنو صار؟
ناس قررت تكسير الكويتيه,وإذا تقولون مو قرار ونيه شينه أقول غباء وثواله
قالوا مؤسسه حكوميه وترسوها موظفين أكبر من حاجتها,وبدال مايعالجون الوضع ويتوسعون في محطاتهم وعدد الطائرات سوو ا العكس
سكروا محطات مربحه,وبطّلوا يشترون طائرات
وما إكتفوا بالخراب , قالوا خصخصه .قاموا يعلجون بهالكلمه من سنين ضيعوا فيها ماتبقي من ولاء بعض العاملين ,ودخلوا الموظفين في دوامة الحيره والخوف من المجهول
وطبعا الخراب فنّ عند ربعنا. طيّنوها بسالفة تحرير الأجواء .خلّوا كل طيارات العالم تنقل عبريه من الكويت إلى أي مكان وناقلنا الوطني ,خنت حيلي يالأزرق,مو مستعد ولا مؤهل لهذه الخطوه وطياراته قليله و متهالكه.
وتراجعت الكويتيه ,أداء وسمعة,حتى أصبحت على حافة بالوعة النسيان.
وكل هالسوالف خلّت الكويتيه ماتسوى ربع دينار في سوق الخصخصه.لا وفوق البيعه راح يخْلون العماره من المؤجرين ,قصدي الكويتيه من الموظفين.
الله يعينج يالكويت على التخريب.
وإحنا مساكين بنخسر مؤسسه دفعت فيها الدولة مليارات ,وبيصيّعون عيالنا الموظفين
وبنفقد شعورنا إنا بالكويت من نركب الكويتيه عقب سفرة طويله.
وفي الختام ,إن شالله ما تتكرر حوادث الكويتيه ويحفظ ركابها والمسافرين أجمعين.
T7l6m 
تدري …
على ردى الكويتيه…
بس أفضل أسافر عليها…أئيد المنتجات الكويتيه وأئئيد شغل الديرة…
أول شي.أدور حجز بالكويتيه..اذا مالقيت تالي أدور غيرها…
بس لما تواجهني مشاكل معاهم…
اقعد اسف واتف واقول الشرهه مو عليهم علي انا الي ركضت لهم:)
عندهم مشاكل وايده..خل سالفة مشاكلهم الجذريه
حتى ابسط شي..مع العملاء عندهم مشكلة
يعني وحده مثلي اتسافر شكثر…وأميالي واصلة لي قُبل…
كل ما ادق اكلمهم يقولون لي كرتج في خطأ والاميال مادشت ..وتعالي راجعي
اقص يوم كامل من عمري اروح حق موقعهم الداثر ويقولون لي
ملفج ضايع والا ماعندج اميال لازم كل سفرة اتيبين لنا التذكرة على شان اندخل اميالج لج!
تخيل!!!
كل شوي اروح لهم يعني مذلّة…قمت اسفه سالفت الأميال واطنشها
ف كلش ما استفيد منهم أبداً ابدا…
مع هذا..ما انسى وقفات ريايل الكويتيه الشقردية معاي بالخارج…
من وزن..وأماكن..وتذاكر بمواسم الزحمة…
هذا بروحه يبيله بوست
بالنهاية..الكويتيه اتذكرني بالكويت…
قارن القصة كامله ..ماتحس نفس الشي!!!
عساك عالقوة…وربي يصلح الحال
الواحه هذي سوالفها
دايما مضيعه
بس مو ضروري تراجعينهم إتصلي وزفيهم بعدين عطيهم رقم التذكره ويعطونج الأميال
سالفة شقرديه أنا أشهد
والله إن قبل أسبوع راجع من مصر وتعب واحد من الركاب لو شايفه شلون إهتموا كل المضيفين ورئيسهم
فيه تسامحينهم على كل السلبيات
وأخيرا أجزم إن الكويتيه مثل الكويت بس على أصغر
وحياج الله،والله يصلح الحال
اييييييي الله يعيننا
مالكم إلا طريج البر
صدقت و الله مسكينة الكويت ابتلشت فينا ، و ابتلشت المؤسسات و الوزارات الكويتية بالكوتيين ، المحسوبية و الواسطة و القرابة حلت محل الكفاءة ، دوائر تنشأ من اجل افراد ، لكن المصلحة العامة طزززززززززز
المشكله حتى إللي مو كفو ويسلمونه مركز
ما يشتغل
يعنى لا كفاءه ولا دوام