Articles

إعترافات

In عام on 07/11/2010 by t7l6m

كان في برنامج إذاعي قديم يختارون فيه شخصيات وكل شخصيه تقول الأشياء إللي تحبها وإللي ماتحبها.إللي يضحك بالبرنامج الكسرات القويه فيه,لا تسألون شلون لأن اليوم آنا الشخصيه وراح تعرفون شقصدي.
أحب الشتا
ماحب الحر
أحب منظر الشروق على البحر
أحب الهدوء
ماحب البيديان المقلي
ماحب الأجهزه إللي مأعرف لها(متخلف تكنولوجيا)
أحب كل اليهال لي عمر 3 سنين
ماحب الياهل المليق والدلوع والمزعج
أحب النظافه والترتيب (مكتبي قمة الفوضى)
ماحب الظلم
ماحب الزحمه
ماحب تكاسي مصر الأبيض والأسود
أحب الهريس
أحب الكنافه
ماحب القهوه والجاي إذا الشكر زايد
أحب عيالي (وإن شالله الشعور متبادل)
ماحب أوقف بطابور لو جدامي نفر واحد
أحب أقرأ (وماعندي وقت كافي للقراءه)
أحب الأفلام الأجنبيه
أحب آل باتشينو وجاك نيكلسون وروبرت دي نيرو وجوليا روبرتس
ماحب ديّن جمبازي كلكجي
ماحب الغبار
أحب الفلفل
أحب الجوتي المريح
أحب نومة الظهر (تقدرون تقولون أموت عليها )
أحب مرق اللحم (قرع مو باميه)
ماحب أركب مع واحد غشيم
ماحب الإزعاج
أحب السمك والربيان
أحب السفر
ماحب الترانزيت
ماحب الكلاب والزهيويه (بس مو كثر واحد من الربع )
ماحب جرايدنا وتلفزيوناتنا (مو كسره .مقصود الترتيب)
ماحب الحمامات العموميه (حتى لو نظيفه فما بالك إذا كانت جلجه وشخابيط عالطوفه)
أحب الآي باد (يعني عندي)
أحب شاي حليب
أحب بوكي متروس والحساب راهي (الحمدلله)
ماحب السلف (إعتبروه تحذير عام)
ماحب نص الشهر (الموظف يعرف ليش)
أحب الطبيعه والخضره(جرجير وخلافه)
أحب السيارات الألمانيه(وأركب ياباني)
ماحب قلم الرصاص (ماعرف أكتب فيه ويخلي الكتابه بطيئه)
ماحب الغرور والثواله (وإذا إجتمعوا بشخص تلوع جبدي)
أحب إللي يعتذر إذا غلط (شجاعه وذوق وأدب ويحرجني)
ماحب طابور الصباح أيام الدراسه(خاصة بالشتا)
ماحب إللي يطول عالمسجل بالإشاره(أحتقره)
ماحب مدرس الرياضيات إللي درس ولدي من خامس لي تاسع (إبتلشنا فيه)
أحب أتعلم شي يديد
أحب التصميمات الحلوه
أحب يمعة الأهل
ماحب القعده مبجر ومو شبعان نوم(99,99% من الأيام)
ماحب الأعصاب والتشنج

أحبكم كلكم (من صجي .كفايه متحملين ووصلتوا لي هني)

Advertisements

16 تعليق to “إعترافات”

  1. لووول
    عيل الخضرة والطبيعة صارت جرجير

    انزين ماقتلنا تحب التحلطم ولا ماتحبه؟
    🙂

    • تبين الصج ما أحبه وودي بس أمدح وأقول كلام حلو
      المشكله ما يخلون الواحد يقعد مرتاح
      يحدونك على التحلطم

  2. وانا اعترف انك مميز

    • هذا من لطفك وذوقك
      أشكرك وأتمنى أكون مثل ماقلت
      حياك دوم وتسعدني تعليقاتك(حتى لو تطب فيني)بس واللي يرحم والديك لاتسويها
      منورنا يابوشهاب

  3. يصير نقدم اعترافاتنا احنا بعد

    🙂

    • أكيد يصير وإحنا ناطرين إعترافات الكل
      آنا حديث الفجر دازتلي تعليق وتقول عندها بالبلوج إمتحان
      شفت الإجابات وماشفت أسئله
      قمت وإعترفت
      ناطرين الإعترافات الزينه

  4. لووول
    اعترافات حلوه وخفيفه
    و لو زايدهم جان هم ماملينا ؛q
    اما المدرس الي ناشب فيكم =\ لزقه
    الله يعين ولدك

    و ترى اتبرع بتنظيم مكتبك;q

    و قواك الله

    • من ذوقج
      وإن شالله نجحنا بإمتحانج
      المدرس ياب أجل الولد علميا ودخله أدبي
      وبخصوص المكتب أفكر أحرقه ومشكوره على التبرع الكريم
      وحياج الله

  5. خوش اعترافات
    انا بعد دزلوي حبيبات قلبي الاعتراف
    والله يعينكم علي…

    🙂
    وتبي الصج؟

    نص اعترافاتي متشابهه معاك
    خصوصاااااا اعتراف الزهيوي ومرق اللحم!

    يوعتني:)

    مسى الخير

    • صباح أزهار البرتقال وكل الميوه
      ناطرين إعترافاتج دوك
      على أحر من لهب بنزن

  6. نبلش اعترافاتنا

    🙂
    احب الشتا بس ما احب البرد الناشف
    ادوخ بالحر ..( ممكن يغمى علي عااادي)
    احب العتق بشكل مو طبيعي ( كلامي عتيج وطبايعي طبايع عيايز)
    احب اجمع البخور والطيب
    احب اجمع الأنتيكات
    احب كل شي فيه بيديان (لووول)
    اعشق البحر بشكل جنوني
    واموت بالحداق
    احب السي فود وما عندي مانع كل يوم غداي سمج
    احب الهدوء
    ما احب الأماكن المزحومه
    احب فيرزو وام كلثوم وعمر فاروق تباليك وحسن اوساكت واغاني السلطنه
    واعشق السامري
    ما احب الراب والتكنو والهافي متل
    ما احب الحلو كلش
    واعشق كل شي فيه بهارات وفلفل
    صريفه درجة اولى وايدي تخر فلوس
    ما اشوف تي في الا ما ندر
    وما اسمع راديو
    وما اقرا جرايد هم الا ما ندر
    ومثلك ما احب الياهل المليق
    ومو زود مع اليهال عموما
    ما احب احد يسوق فيني
    ما احب احد يتفلسف على راسي
    اكره التفيشر وعندنا ورحنا ويينا
    ما احب احد يستهين بذكائي لأني دايما اصيد اللي جدامي
    اموت بالجلاب والقطاوة وعندي حاليا جلب
    اكره البريعصي واموت خوف من الزهيوي
    ما اكتب الا بالرصاص
    احب السياره اليديده باحساسها وريحتها
    احب اللبس وايد
    احب القشمره والشطانه
    مع العلم اني جدية مع معظم الناس
    اعشق القهوة بس ما اشربها وايد
    ما احب الشاي
    ما احب المغالاة بكل شي
    واحب البساطه بكل شي
    ما احب الإلتزام
    ما احب الطياره ولا المطارات
    ما احب المكان المغلق والشبابيك الصغار
    احب التفاح الأخضر بالملح
    احب يمعة البنات اللي دمها خفيف
    ما احب القرقة الزايده
    ما احب الشخص اللي يتكلم عن نفسه وايد
    لووووووووووول

    وانا تكلمت وايد

    وصباحك طيب يا تحلطم
    وعلى الوعد سويت الواجب
    🙂

    • صراحه طالبة مجتهدة ,كفو وعدتي ووفيتي
      بس شلون تفاح أخضر وملح,بدون ملح حامض قنيط بس بجرب وأشوف قصدي أذوق
      البيديان بكل شي مثلي أموت على المتبل و المسقعه (بمصر وبدون لحم)
      وعلى فكره في أشياء نحبها وما نطولها مثل الهدوء
      وفي أشياء مانحبها ومجبورين فيها مثل الزحمه والإلتزام
      صباحج أطيب

  7. يه يه يه….

    السالفة فيها اعترافات …
    بس والله من اعترافاتك انت كويتي اصلي 100%

    بس ضيقت خلقي ليش ما تحب البيديان انا مثل الزين اكل اي شي فية بيديان ما بقى الا اسويلهم كيكة بيديان ؛)

    خوش اعترافات ويمكن نمسك عليك بعضها
    🙂

    • شنسوي قالولي أسجل إعترافاتي وطاوعتهم وبيني وبينج ماكذبت خبر
      لا يضيق خلقج ماحب البيديان إذا مقلي, إنتي شفتي شكثر يشرب دهن تقولين بعير عطشان,لكن أحب كل مشتقاته وتحديدا المتبل
      وإذا سويتي كيكه بيديان دزيلنا قطعه نذوقها
      وإذا بتمسكون علي بعضها آنا ماسك عليكم سالفة السلف
      حياج الله دوم

  8. هههههه

    اعترافات حلوة 🙂

    يعطيك العافية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: