ربما كنت سأدعو لهم بالهدايه
ولكن لتكرار عملتهم السوده ولفداحتها
وحيث إني منغث أكرر دعائي عليهم الله لا يغنيهم
تدرون منو هالمقاريد ,الملعّن ,الظّلام إللي بطوا جبدي وحرّوني؟
شركات النظافه والخدمات إللي مايعطون العمال الفقاره المساكين معاشاتهم
شياب الطاري؟
الشركه إللي ماسكه خدمات وزارة الماليه ما دفعت رواتب العمال شهرين أو ثلاثه وخابرين البنغال قشران قرروا يسوون إضراب(أعتبرهم شجعان بحالتهم هذي)
يعني فقاره يايين يترزقون ,معاشاتهم رديّه,سكنهم الله لا يراويكم,وظايفهم كسافه,مسؤولينهم أعوذ بالله
والخمه الشركه قابضه من الوزاره دبل المعاش إللي تدفعه لهم ,وعقود بكل مكان,و فوق هذا مستغلين العمال
لا تذاكر إذا خلصت إقاماتهم,على كل معامله ياخذون منهم فلوس ,أي غلطه أو تأخير خصم من المعاشات ومرات حتى الطق يطقونهم
وفوق كل هذا ياللي ماتخافون من الله ماتعطونهم معاشاتهم
آنا ابي أعرف وين المسؤولين ووين وزارة الشؤون ووين حقوق الإنسان
فلا تلومون العمال إذا ردوا بلدهم قاموا يسبونا,وإذا عندنا يكرهونا بقلوبهم
ولا تلومونهم إذا خربوا أو باقوا
ترى الظلم ظلمات يوم القيامه
والفلوس الحرام زقّوم في بطون إللي ياخذها
وأكرر للشركه وملاكها “يامالكم الفقر”
وأختم بدعاء أمي الله يرحمها
ربي لا تولينا من لا يرحمنا
إضافه:
كتبت البوست قبل جرايد اليوم .ومكتوب بالقبس إن المضربين 9000 عامل
والأنباء تقول أن سبب الإضراب المطالبه بتطبيق قرار وزير الشؤون الصادر قبل 8 شهور تقريبا (1/3/2010)
برفع الحد الأدني لأجور عمال النظافه لتصبح 60 دينار شهريا وإلتزام الشركات بنقل العماله إلى سكن تتوافر فيه شروط السلامه والصحه وفي المقابل تلتزم العماله بعدم اللجوء للإعتصام أو الإضراب
الشركات مانفذت القرار والعمال إستخدموا حقهم الطبيعي والمفروض أن يكون مكفول قانونا
T7l6m 
رجل ترك زوجته وأولاده وأقربائه ووطنه وأتى للكويت يبحث عن أي عمل لكي يطعم أولاده
ويجد العمل وبأخر الشهر لايتم أعطاءه الراتب ولمدة ثلاث أشهر يعني ثلاث رواتب
ماذا يحصل لزوجته وأولاده اللي ذهب ليجلب لهم المال
ظلم كبييير ماينسكت
وإذا أهل الخير ماحلوا القضيه ستحصل كارثه
بسبب الظلم الذي يحصل في الكويت
وللعلم أن قضية عمال النظافه هذي احد القضايا
فهناك قضايا كثيره يتم فيها ظلم البشر
والله المستعان
اشاركك الخوف من كارثه بسبب الظلم إللي يحصل في الكويت
وأكرر الظلم ظلمات يوم القيامه
والله المستعان
وحياك الله يابوعبدالملك
حسبي الله و نعم الوكيل .
يجب على الجهة المعنية عدم الدفع للمقاول الا بعد التاكد من انه قد قام بتحويل رواتب العمال الى حساباتهم الخاصة في البنوك ، و في حالة تاخره عند دفع رواتبهم فيكون للجهة الحق بالدفع لهم مباشرة ، و خصم المبالغ من الدفعات المستحقة للمقاول.
هذا هو احد الحلول المتبعة في الشركات التي تحرص على رضاء جميع العاملين فيها مباشرة او عن طريق مقاول .
و الله لا يغنيهم و لا يوفجهم ، و يضعهم في حاجة باذنه العزيز القدير.
الله يرحم أمك و أبوي و جميع موتى المسلمين
تحلطم
ذاك اليوم صديقتي اتسولف لي عن دوامها عمال النظافه الي عندهم الرواتب تنزل بحسابهم بالشركة مباشرة الظاهر تطبيقا للقانون أعلاه إلي قلته فالشركة شنو مسوية معينه مسؤول على كل مجموعه يسحب بطاقاتهم والأرقام السرية و يسلمهم رواتب بالباطن أقل بوايد تخيل يعني ولا واحد من الي يشتغلون عنده بطاقته و حتى إذا عنده ما يعرف الرقم السري ..
يعني اتنزل لهم راتب بيد و تسحبه بالإيد الثانيه 😦
حسبي الله هو نعم الوكيل
ياويلهم من الله هالخمة اعنبوكم زقووووووم احد ياكل زقوووم
حراااام هالفقارة شذنبهم؟؟؟
احنا بعد بالدوام العمال مايو مساكين مضربين والله زين يسووون
زغنبوط في بطونكم المال الحرام قولوا آمين
والله يرحم اميمتك صاجة
😦
واحنا شنو سوينا علشان هالعمال المساكين غير الدعاء لهم والدعاء على من ظلمهم؟ كلنا صرنا مثل العيايز ما لنا حيله غير الدعاء؟ وين اتحاد عمال الكويت وين المنظمات الحقوقيه بالكويت وحقوق الانسان ؟ ليش ماكو محامي يتبنى قضيتهم . تتذكرون بالغزو لما حسينا بالظلم وان الكل تخلى عنا . كل عامل مظلوم عنده نفس شعورنا بذيك الايام وتلقاه بداخله ساخط على الكل .اضعف الايمان نشر اسماء الشركات واصحابها ووضعهم بدائره النبذ الاجتماعي على الاقل .اي واحد فينا لو يخصمون عليه يوم يفضح الدنيا ويشرشح الشئون الاداريه لكن تخيلوا ان المعاش ما ينزل ست او سبع شهور شنو راح يكون احساسكم
لا حول ولا قوة الا بالله العلي العظيم