عند باب الدوانيه بالسروه أزعجني صديق عزيز بسالفه
وأنا بزعجكم فيها
سألني إذا تبي خبز وين تروح ؟ قلت له خباز قطعه 9
قالي فهمت قصدي بالضبط
:قصدك الخبز عند الخباز
رد :لا مو أي خباز، بالنسبه لك خباز قطعه 9
وبعدين
رد رفيجي بإسلوبه الساخر والمليئ بالأمثله والتشبيهات
تخيل واحد يبي تشباتي ويروح مكدونالدز
وإذا بيشرب قهوه يروح البنشرجي
وإذا طفح الماي في بيتهم إتصل على الكهربجي
وإذا يبي يحلق شعره يعرج على راعي الأوتي
وإذا عياله مو فالحين بالدراسه وداهم المستوصف
ويقضي عطلته الصيفيه بالبر ,تغيير
وإذا إخترب قاري ولده يصلحه عند الخياط
قلتله واضح ,الحبيب مضيع ,والإتجاهات عنده مخربطه
خضخض راسه مادري تأييد أو يقولي ماعندك سالفه وكمل كلامه
ترى إللي صار هاليومين هذي سِبّته
قلتله :شقصدك ؟موفاهم!
خزّني وجاوبني بسؤال:إذا حسيت إن وزاره ظلمتك شتسوي؟
قلت:أشتكي ,أتظلم ,أكلم المسؤلين ,أرفع قضيه
قال:كلامك منطقي,يعني ماتغلط على المسؤول بالوزاره ولا على أهله بالتلفزيون جدام كل الكويت ولا تعايره بأشياء صارت من عشرات السنين أو تعايره بمميزات يحصل عليها
قلت:إحتمال كبير أسبه بقلبي بس ما أغلط عليه أو على أهله جدام الناس .أهله شكو.أهو بالنهايه موظف يعني عبد مامور العله بوزارته إللي ظلمتني.
قال:إنزين إذا إنت المسؤول إللي غلطوا على أهلك شتسوي
قلت:مافيها روح تعال,أرفع قضيه وأشرشح المحطه إللي بثت الغلط بالمحاكم
قال:يعني ماتكسر لمبات بيتهم أو تنبشر سيارته أو تكسر جامتها أو تخرع الخدم في بيتهم
قلت :أكيد لا,شقالولك آنا فوضوي
قال:ماقول إلا الفوضى والتسيب خربت بوصلات الناس وضيعت إتجاهاتهم والناس نست شي إسمه القانون
وختمها الله يهديه بكلام مصري
آل ايه آل دولة قانون آل -وهدني وركب سيارته
تركني وأنا في حيرة ,مافهمت من كلامه ولا شي ! ومادري شقصده؟
ويلح على تساؤل لم أجد في كلامه إجابة له
تهقون إللي فيه قلب يروح دكتور أنف وأذن وحنجره؟
T7l6m 
صباح الاستعارات والتشبيه
🙂
رغم ان صاحبك ما شاء الله عليه اسهب واسهب واطال
الا ان ترا حكيم الناس مضيعه البوصلات والاتجاه
!!
اقضب بهالصاحب الحكيم
والسوالف ما تحلى الا حزة السروة
🙂
ياريت الناس مضيعه صج
الناس “عارفه بس مدكنه”على قولة سعيد صالح بمدرسة المشاغبين
وهالصاحب ماني هاده كل قعده وياه فيها بوست.وين يحصل صاحب جذي
وحياج الله
صاج صاحبك ، الناس مضيعة .
اللي يبي يوصل سالم يتبع قواعد المرور .
و اللي يبي الجنة ، يتبع قواعد الاسلام .
و هكذا ………….. !
القواعد و القوانين ليست مغيبة ، لكن الناس تختار انها ما تشوفها.
مثل كويتي ” طق المربوط ، يخاف المفتلت ”
اللهم امنا في اوطاننا و اهدنا الى ما فيه صلاح الامه و الوطن .
آمين
وإن شالله تكون هالسالفه خيره
وبداية تطبيق جدي للقوانين
والله اتوقع طبيب عيون احسن @@؟؟؟
ضحكتني العبارة
والله ياتحلطم ما عدنا ندري شنقول والا شنغبر
الله يحفظ وطني…
الكويت يادانة الدنيا وياتاج الاوطان
ياديرة هلي من ماضي الازمان
الله ياخذ النفط على قولة يدتي
خيره مايوازي اذاه
والله وهي صاجة
سامحني نفضت شوية من غش جبدي
🙂
شتقولين وشتحجين
الله يحفظ الكويت ويصلح أهلها
والنفط ماله شغل
النفط نعمه لازم نحمد ربنا عليه
وإخذي راحتج بالفضفضه
صدقت يا تحلطم عن الطبيب
هالايام
اللي في قلب يروح الدوانيه واهم اللي يشورون عليه
ويقولون له خذ هالدوا ولا تاخذ ذاك..
لا وازيدك..ان كان ماشي على ادويه
ينخلونها ويختارون له شنو يكمل عليه وشنو مايكمل…
ورفيجك هذا…
حكييييم…ذكرني بحكمة جحا!!!
اهي سالفة مادري شلون قايله
بس من وراها حكمه…
الله المستعان وانا اختك ..والا الشق عود
دكتوره،كنت كاتب اللي فيه بواسير يروح انف واذن وحنجره وبدلت البواسير بالقلب
بسبة بعض التعليقات
وآنا مثلج أدعي ربي إن شالله السالفه يكون وراها حكمه وتكون صحوه من ضياعنا الحالي
الشق عود مافي شك لكن نتمنى باجر أحسن من اليوم وعيالنا إن شالله يعيشون بكويت أحسن من كويتنا
والصلاح من رب العالمين
وحياج دوم دكتوره
من القانون الفرنسي : العدل البطيء ظلم
إذا كان فيه ظلم من ناحية تطبيق القانون شنو الحل ؟؟
مشكلتنا ماكو تطبيق قانون
اممممممممممممم حلو التشبيهات يبتها على الجرح