إختصار مُخِل لماسبق ننصحكم بعدم قراءته:
قدمت خدمه وحصلت على أسلحه تغير الأخلاق,وقمت بتجربه ناجحه.
التكمله:
كشخت وتكلينت(تعطرت) خذيت المسدس وقنبله وآنا حدي متصروع وأقول بقلبي المسدس جربناه بس القنبله مو وقته تطلع صجيه وتطشرني وأصير خبر عاجل
ركبت السياره ،وقدتها تجاه منزل بوعلي،وما أن دخلت الدوانيه حتى تعالت الأصوات “اووو ,شوف منو يانّا,زين بينت, يالقاطع” وبرز تعليق بوعلي (بوشلاخ)
مو قلت لكم ياي؟
الشله: و إذا قلت ،شدعوه بنصدقك، بوعلي تونا نعرفك!
وبعد السلام والبوس واللذي منه جلسنا، وبدأت مواهب الشباب بالتكّشُف
برودكاست (فتّان): ها خلّود قايلك الريال مو شايف نفسه علينا و إنت توليتنا “متكبر عليكم,متكبر عليكم”
النيس(لسانه زفر) :إكل (فضلات بشريه) , يعني بتوهقني ويا الريال يا إبن ال(@#$#)
السوسه: صج بو ولاّد ليش تحش بالريال
قابلت الحوار بإبتسامه و حاولت أغير الموضوع وأخفف الضغط على النيس ,قلت:يمون بو وليد
السوسه ما طوفها وقال في نبره تصنع فيها الطيبه والصدق:صج صدرك وسيع لو واحد ثاني ما يهدّه
وغطى على السوسه كلام تبادل توجيهه كل من بو علي وطلال الجعص :
*الريال من متى ما شفناه ,والله فشّلتونا
*تلومون الناس ما يمرونكم من سوالفكم الخايسه
*نحّشتوا نص الربع و بييكم يوم تقعدون بروحكم
وبعدما إنفرجت الأجواء , صرّح الجعص : اليوم أنا يايب عشا .وإلتفت علي بوجه يكسوه الحبور:ما بغينا نشوفك
الجميع:هووب ,هوووب ,من قدّك خليت طلال يشق الجيس والله إنك منت سهل
البطاطا (متين ومغرور),بنبرة ملؤها التهكم:ومتى يشرّف عشاك ياحاتم طي ؟ يلحّق على هالألفيه !
الجعص :بسّك طنازه ياعود الخيزران ,العشا جبالك على ذيك الطاوله
وأشار الى طاوله تحمل كيس لا يبدو من حجمه إنه عشا , وإن كان كذلك لا يكفي أكثر من شخصين
البطاطا: شلون قلقصت القوزي بهالكيس, ولا يايب قوزي قزم
الجعص:تضّحك؟ قوزي هالحزه ! يقعد على الجبد وما تنام
يبت لكم بربع دينار فلافل وماعون حمص
وعلى خلفية قهقهة الحضور وصخب ضحكتاهم
البطاطا:إشوراك,لو ياييب شي ثاني جان حطوك ب “حدث في مثل هذا اليوم”
تجاهلت الحوار الدائر وإلتفت على برودكاست الجالس بيني وبين السوسه وإستفسرت منه عن أحواله وصحة الأهل, وإنطلق:
تدري أبو طليل طلع مدكّن و عنده عمارات وأراضي .يقولك بس الكاش إللي ورثه طليل مليونين .ما تشوف البطاطا معصّب كله يقول هالجعص كفو يصير عنده هالكثر فلوس.وتخيل للحين على الكريسيدا.أمه فحطت تقوله إشتر لنا بيت عود وهو مو راضي تلقاه يبي يارثها بعد.
تدري إن خلود مرته طلبت الطلاق . تقول ما أقدر أعيش مع واحد البالوعه أنظف من لسانه
وكنت في شدة الإمتعاض وأنا أستمع له وهو ينشر غسيل أصدقاءه فدسست يدي في جيبي وأمسكت بقبضة المسدس ووجهت فوهته نحو فخذه ظاغطا علي الزناد
حينما هم واقفا
يتبع,,,,,,,
T7l6m 
شكل هالاموضوع مسلسل مصري
بنطر الحلقة الاخيرة ونفس اي مسلسل مصري افهم فيها البداية و اعرف فيها النهاية
الحبيب سمعت بعصر السرعة
آنا سبق وإن حذرت أن القصه جذبت منتجين أتراك
يعني مو أقل من 140 حلقه
بعدين إحنا بالحلقه السابعه وشكلك للحين ماعرفت النهايه
وآنا يالحبيب سامع بعصر السرعه بس في أشياء السرعه تخربها
يعني في فاست فود وفي مطعم مغربي أو فرنسي
في روايه وفي كاريكاتير
كذلك في أشياء تتطلب الركاده وتخربها الطفاقه
مثلا هل تقدر تطبخ هريس أو يريش بنص ساعه
يأخي حتى النخي والباجله يبيلهم وقت علشان يستوون
فمابالك إذا تعلق الموضوع بتسكير مدونات!
ههههه
روعة ياتحلطم
تملك القدرة على كتابة السخرية الراقية
وهذا خط نادر جدا
ولاحظت وضوح تصوير هذه الشخصيات المعقدة التنوع بماقل ودل
إستمر
إني أشعر بالقيمة الفنية العالية لهذه السلسلة الرائعة
وقوة حبكتها
والعجيب والطريف جدا اليوم لكوني رائد لدواوين كثيرة
هو خلال قراءتي كنت أشعر كيف تنعكس شخصيات قصتك مع شخصيات حقيقية عرفتها
في خلفية مخيلتي فتزداد معها متعة المتابعة
إرمي بارك الله فيك
إنته قاعد تسطر عملة نادرة
متابع بمتعة
عسى طال عمرك ويتبعك
نبي ولد الجزيرة يقفط حتى الأتراك
🙂
شكرا بوحمّود على جرعة التشجيع
وقوة الدفع الإضافيه
و بإذن الله مقفطين الأتراك
وإن شالله يستمتع الجميع
والعجولين مانسيناهم و كتبنا المختصر المخل
ضحكتني بآخر ساعة من الدوام 🙂
ناطرين ولو ان السالفة فيها 140 حلقة !!
شوي مبالغه 140حلقه بس معطي نفسي العذر
وبنفس الوقت تحذير للعجولين
ناطرين الجزء الثاني
إن شالله ماتطول نطرتك
حياك الله
هههههههههههههههههه
الله يغربل بليسك ..
مت من الضحك ..
ناطرة الــ يتبع
إن شالله مايطول الإنتظار
حياج الله
:))))))))
ناطرين وخوش مسلسل لا يوقف حيل مستمتعة بقراءته
🙂
إستمتاعكم بالقراءه يبعث فينا السرور
ودافع للإستمرار
لوووووووووووووول
شنو هالربع
لالالالا
شنو هالحش صكيتوا على الحريم وسوالفهم
وي وي غبرا .. وقف ؟!! يعني جكك ؟!!
مصيبه
خووش تعلوقه ..
welcome back
حق المسلسل التركي;q
خوش بارت ..
متابعين باذن الله 🙂
واحد إللي يحش مو كل الربع
لا ما جكني .حشته بس مادري وين
وإن شالله ماأعلقكم وايد
اولا الحمدلله على عودة سلسلة نهاية مدونات ، انا من المجحفين في القراءة و لن اقول من المقلين ، و لكني قرات رواية بعنوان بنات الرياض و هي عبارة عن مجموعة من الرسائل التي كانت تبعث في البريد الالكتروني اسبوعيا ، و قامت الكاتبة بطباعتها كرواية لاقت استحسانا كبيرا و اعجبتني كثيرا ، ارجوك و بعد الانتهاء من سلسلة نهايةمدونات ان تنشرها و طبعا نصف الارباح ستكون من حقي ، بصراحة السلسلة رائعة
راح أبدأ من حيث إنتهيت
الرائع أنت والمتابعين للسلسله على ذوقكم معاي وتشجيعكم لي
والسلسله خالصه براسي والتأخير سببه رغبه بكتابتها كامله قبل عرضها في المدونه
لكن المشاغل والظروف ماساعدتني
إن شالله وبعونه سبحانه راح أنزل حلقه كل يومين بالكثير
وبخصوص الأرباح إخذها كلها حلالك
بس الطباعه على حسابك