Articles

خاس الطماط

In إقتصاد, عام on 02/10/2010 by t7l6m

أطلقت مدونة الدستور حمله مضاده لإرتفاع أسعار الخضار وتحديدا الطماط بعنوان
“خلها تخيس”
وكما وعدت لو كويت, أول داعم للحمله, أعلن أنا وياهم

والمنطق يقول لازم يكون للمواطن دور في محاربة الغلاء
كما أعتقد أن مقاطعة السلع التي إرتفعت أسعارها إرتفاعا جنونيا وغير مبرر له نتائج مباشره وإيجابيه
وتذكرون نتائج مقاطعة المنتجات الدانمركيه
فيا أخوات وإخوان ضروري نسوي شي ومانستسلم لمافيات الخضار
تقدر تقاطع تسوي معروف لكل المواطنين والمقيمين
ما تقدر، لا تشتري سحاره إشتر بالكيلو وعلى قد حاجتك اليوميه مو أكثر
و خفف إستهلاكك من الطماط قدر الإمكان
المرق مره بالشهر أو كل إسبوعين
الدقوس طماطه وحده والباجي معجون
سلطه:جرب سلطة روب وخيار،ذره وجزر، سلطة روكا
وأكيد المدام عندها قائمه بالسلطات الخاليه من الطماط الثمين
(ويمكن للقراء الأعزاء الإفتاء بأنواع السلطات ذات الصله)
الجمعيات لها دور وتقدر تضغط على تجار الخضره
وممكن تنور المستهلك و تكتب على فرع الخضار
“غلاء الطماط فاحش ومصطنع ساهم بخفض أسعاره: لا تشتريه”

التجاره مالها شغل بالموضوع,قصدي من إختصاصاتها متابعة الأسعار
خلها تنورنا وتقول شالسالفه,وإذا الموضوع جمبزه ومافيات تحاسب التجار

هيئة الزراعه ما ادري شنو موقعها من الإعراب فالحه بس تدفع دعم للمزارعين
شوفوهم ليش مغلّين الأسعار وإلغوا الدعم ووزعوه علينا إحنا يالمواطنين

وأخيرا صدقوني لاتعتمدون على التجاره ولا هيئة الزراعه ترى ماعليهم متّكل
ضغطوا على الجمعيات,وكلموا الأعضاء (مو ملوت المجلس )
وإذا كلنا قلنا بصوت واحد “خلها تخيس” راح نخيّس طماطهم
والله الموفق

Advertisements

20 تعليق to “خاس الطماط”

  1. بحاول أقنع الأهل

  2. تدري شنو المشكله
    ان حتى الطماط السوري واللبناني رفعوا اسعاره

    ابي اعرف منو المتسبب بهالأزمه
    وليش الحكومه ساكته
    !!

    • يمكن العكس
      يعني يمكن في سبب رفع سعر الطماط اللي إيينا من بره وربعنا رفعوا أسعارهم
      وآنا مثلج ماأدري منو متسبب وليش الحكومه ساكته
      بس صدقيني كل بزنس بالكويت لا يخلو من الإتفاق بين التجار
      وإحنا الضحيه

  3. معاكم خلها تخيس

    التفاح زادوا سعرة بعد ؟؟

    • عاشوا المؤيدين
      والتفاح أمره أسهل ،والمشكله أن الدور ياي على باقي الأكل

  4. علي انا ما احب الطماط بس علي شانك بقاطعة

  5. كفو كفو
    وخلها تخيس
    مانبي طماطهم :>

  6. ابشرك
    روح شوف شدة البقدونس بجم
    وباجي الخضراوات

    يعني شلون بالله نموت والسبه احتكار التجار
    ولعبهم بالأسعار

    حسبي الله وهو الكافي فيهم

    • مو خوش بشاره
      وهيئة الزراعه ما راح تسكت لأن الورقيات إنتاج كويتي
      تابعينا غدا
      وسبحانه على كل شيء قدير

  7. التجار خايفين عليكم من الاملاح و الضغط!!
    بما انه الطماط يسبب الاملاح رفعوا اسعارة لتقليل من استخدامه في أكلكم ..
    قصدهم حمايتكم ورفعوا شعار الوقايه خير من العلاج -_*

    سلطة حلوة
    شمندر و جرجير و وفقهم قفشة زيت زيتون و عصرت ليمون
    و بالهنا و الشفا

    • لو يخافون على صحتنا ما صنعوا شيبس ورهش
      ماعليك منهم بلاعين البيزه
      وشكرا على الوصفه

  8. داشه عرض …
    جربوا تزرعون ابيتكم ..
    جد ما اتغشمر ..
    ترى الطماط والخيار و الجزر من اسهل الخضار الي تنزرع ..
    و حدا الطريقه سهله ..
    وحق الي فاضي .. تقضي وقت الضايع 🙂
    و بالطريج معاك ازرع جم ورده
    اكرر مو تطنز ;q

    ههه بطلت الموضوع مع الوالد .. جان يشيش ويشتط .. وانا توهقت وضعت بالطوشه ;q
    طبعا اهوا مع الحمله :))

    قواك الله 🙂

  9. أهلنا اهم الخراااب

    نقولهم لا تيبون طماط جنهم يعاندون اليوم على السفرة أكثر شي الطماط!!

    بس انا معاكم ومع الحملة وبنشوف أخرتها مع هالتجار!!

    • مايخالف الأهل لازم يقتنعون بروحهم
      وإذا شافوج مع الحمله يمكن يقتنعون
      والله يهدي التجار

  10. تدري المشكلة ان اتحاد المزارعين قبل فترة تغير مجلس الادارة ولذلك هي ملعوبة ومدروسة بس نصيحتي مو لازم طماط شفية الكتشب زين مع السلطة وعلشان الغلاء الحاصل والمفتعل “خلوها تخيس”

  11. الا الطماطم ياجماعه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: