Statuses

نص ونص

In أخلاقيات, إقتصاد, المرور, عام on 30/09/2010 by t7l6m

يقولون المتفائل ينظر إلى النص المليء من القلاص
وإللي ماعنده سالفه ينظر إلى النص الفارغ
أنا أقول والله فارغين
ييبو لي كويتي ما يتحلطم وأنا آخذ قرض توريق و أعطيه مكافأه له
الحمدلله أمور وايد زينه عندنا وأحوالنا الماديه طيبه
لكن “الحلو مايكملش”

شوارعنا حلوه ومنظمه ,عندنا إشارات وكاميرات والرصيف ملون ,وشرطه ودوريات أكشخ من أمريكا
لكن قائد المركبه تقول قائد الأمه ماله شغل بالقوانين,والشرطه في أمان الله والنتيجه “حارة كل من إيدو إلو”

مدارسنا نظيفه وفيها كمبيوترات ,وألوانها حلوه والصبغ متعوب عليه, والسور لا يحجب البيئه المحيطه (بنين) أو يحميها من البيئه العدوانيه(بنات) ,والكتب متروسه صور ولا ناشيونال جيوغرافيك, والأدراج جديده
لكن المدرسين لك عليهم والمناهج دايخه والإداره ماتدري وين الله حاطها

مستشفياتنا ومستوصفاتنا عندهم عيادات متخصصه وأجهزه حديثه والمخازن متروسه أدويه
وأطباء وممرضات من كل العالم
لكن مواعيد تطول أشهر ,وأخطاء طبيه,و دكاتره متكبرين على المرضى ,ومرضى يطقون دكاتره

عندنا وزارات إختصاصاتها واضحه, يشتغلون فيها خريجين ,ومسؤولينهم الكبار ياخذون سيارات وتيلفونات ومكافآت,
والوزارات متروسه كمبوترات وفاكسات لزوم سرعة العمل
لكن المراجع ياكل تبن من :معامله الموظفين (كنه ياي يطر منهم) والتأخير, والروتين ,وكثرة التوقيعات ,وضياع المسؤوليه,ومرات بسبب غباء وجهل الموظف بالإجراءات أو بصلاحياته

عندنا أسواق حلوه ومولات فظيعه
لكن متروسه مشاكل ,وهوشات, ومغازل ,ويهالو ماتدري شنو لابسين لا وبعضهم يشيلون أسلحه بيضاء سود الله ويّوهُم و إللي ربّوهم فوقهم

عندنا نفط وميزانيه بالمليارات وبنك مركزي وقوانين ورقابه على الشركات ,ومراجعين حسابات
لكن الجمبزه الإقتصاديه هي سيدة الموقف , البورصه دايخه ,والتنميه يتخانقون من يمولها ,و الشباب يدور وظايف ,والشركات معفنه بإعتراف الوزير إللي يرخصهم ويراقبهم

وأشياء وايد لا يسع وقتكم لها ,لكن راح ألوع كبودكم فيها لاحقا
ف إللي مايشوف النص الفاضي من قلاصنا الكويتي أقول له:
عفوا ,وعذرا,وإسمح لي, وسوري

إنت حول

Advertisements

6 تعليقات to “نص ونص”

  1. بس والله على شرحك للموضوع أخوي تحلطم (الحول) يحمد ربه على (هالحوله) اللي فيه ولا يعور راسه ويطالع النص المتروس !!!

  2. منو يقول قلاصنا نصه فاضي!
    ده مليان عالآخر ياخويا :/

  3. هذا مو كلام الي يشوف النص الفاضي بس
    هذا كلام الي يشوف النصين واهوا احسن من الي يشوف المليان بس او الفاضي بس :))

    و يااني اكره هذي التجربه ;\

    • ودنا قلاصنا دايما متروس
      بس الواحد أمره لله
      يشوف النص الفاضي ويحمد ربه على المليان
      وحياج الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: