كنت أسولف ويا مدامتي وأنا شوي كاشخ عليها (ما أقدر أكشخ وايد تجنبا لتداعيات قد لا يحمد عقباها)
قلت لها قريت اليوم في موقع consumerist.com إللي طلعلي وآنا أتسمبل على stumble upon
أن هناك تجربه في مدرستين بأمريكا وحده في نيويورك والثانيه مادري بأي ولايه
حطوا بالمدرستين مثل مكينة البيبسي بس ماتطلعلك بيبسي أو شبس نفس إللي عندنا ,مكينتهم تطلع كويسات (جمع أكياس صغيره) فيها جزر قزم (بيبي كاروت) والأكياس عليها طباعه جذابه ورسومات وألوان لإغراء الطلبه (مطبوع على واحد من الأكياس -إكلنا مثل ماتاكل الجنك فوود)
وقعدت أقول شنو فوائد تعويد النشء علي تناول الخضار والأكل الصحي لتجنب السمنه وما يرتبط بها من أمراض مستقبليه
لحد الآن وأنا عبالي كاشخ كان تصدمني بمعلومه وايد حلوه وما صدقت تصير عندنا
تقول الله يخليها لي ولعييلها و يصبرها على بلاويي
قالت: شفيك,إذا الأمريكان يبيعون كيس الجزر حق عيالهم بخمسين سنت دار الشفا أحسن منهم
شلون؟
تقول:بكل ريبشن ,الرئيسي وحق كل عياده حاطين أكياس فيها خيار وجزر مقصص تعال وأخذ إبلاش
بصراحه الحركه وايد عجبتني وتعجبت شلون مؤسسه رزقها من المرض تفكر بطريقه إيجابيه لمصلحة عملائها
وتدفع من كيسها بعد
فلها مني كل الشكر مؤكدا أنه لاتربطني بالمستشفى المذكور أي علاقه إستثماريه بل تخسيريه بعد إلغاء خصم النقابه
كما لايفوتني في هذا الصدد دعوة المواطنين الكرام إلى عدم إفشال المبادره وتجنب أخذ الأكياس سفري لتحويلها إلى سلطه بإضافة الطماط ودريسينج
وإلى أخواتي المراجعات: لا تفشّلونا وتترسون جناطكم
T7l6m 
ليش لا ، ليش مستكثرين علينا ان نكون مبدعين و سباقين ، اشاركك الشكر و التقدير لكل المؤسسات الداعمة للمجتمع
لا والله مو مستكثرين يطلع منا إبداع ومبادأه
أهل الأفكار والإبداعات مايخلى منها أي مجتمع
وعندنا مبدعين وإبداعات ونجوم كويتيين
صحيح أن البيئه الحكوميه مو مشجعه لكن الكويت لا تخلو من
المبادرات الفرديه ومبادرات القطاع الخاص المبدع ذو الفكر المستقبلي
عليك جمع و ترجمه خطيره ;q
اول مره اسمع بهالشي ;\
يحليلهم .. خوش شي والله
اي و الله ولازم انساندهم ونشجعهم 🙂
التفاته جميله جدا منك 🙂
يزاك الله خير 🙂
الجمع والترجمه تمتا بالإستعانه بلسان العرب أو يمكن العيم مو متأكد
ويزاج الله مثله
كنت بأعلق بس الجملة الأخيرة “قتلتني” لووووول
الله يخليلك مدامتك وعيالك ويبعدكم عن زيارة المستشفيات يارب
دمت بخير 🙂
الله يسلمج ويبعد الجميع عن المستشفيات
ويبعدنا عن موضوعات النار والشرار
انا من الصبح راز ويهى عند مستشفى دار الشفا
ومسكت الدور على الاكياس بس مع الاسف مالقيت شى
بهالمناسبه لقيت دكتور سنان من احد الجنسيات العربيه يايب مدامته والاولاد وكل واحد فيهم ماخذ عشر اكياس
البلاش سعره فيه 🙂
هذا اللي حذرنا منه
وعلى فكره البلاش بدون سعر
لا
البلاش سعره فيه
وبمقوله اخرى مال بلاش ربحه بيّن