كحل الصفحه الأولى لجرايد اليوم خبر تجديد حظر حكومة أندونيسيا إرسال العماله المنزليه للكويت مرجعة ذلك إلى أن للكويت سجلا سيئا في حماية العماله
المنظمه الدوليه للهجره تقول أن حكومتنا جاده في حل هذه المشكله وتحسين الوضع
والمنظمه نفسها تقول أن لسفارة أندونيسيا ,مثل سفارات أخرى,مركزا للجوء الخادمات يضم الأن 600 خادمه (من 60 ألف خادمه)
يعني 1% من الأندونيسيات منحاشه من معازيبها
نقول بعضهم عياره,وبنفس الوقت نقول أكو خدامات متحملين ظيم المعازيب وما نحاشوا
الخلاصه,أنا متأكد أن الحكومه ماتبي عوار راس وكلام بايخ عن الكويت بالتقارير الدوليه,وواثق من تصريح المنظمه الدوليه بجدية الحكومه
الدور الحين على إللي مايخافون من الله ومايرحمون خدمهم
ترى في ناس تجوع الخدم وتحرمهم من أكل إللي بخاطرهم
وفي ناس تحتقر أو تسب أو تخانق خدمهم
وفي إللي يمدون إيدهم و أكثر وصدرت أحكام قضائيه ضد معازيب بسبب ذلك
أنا ماراح أقول شنو يوصينا دينا , أو سنة رسولنا عليه الصلاة والسلام في تعامله
اقول إنت يا معزب ومعزبه
ترى الخدم بشر يعني محتاجين أكل , فشوف إنت ومرتك وعيالك شكثر تلفلفون قبل لا تطالعون الفقيره على أكلها
والخدم مو سوبرمان ترى يتعب ويزهق ويحتاج ينام مو تسهرونهم وتبونهم من الفجر صاحين و إنتوا مكبرين مخادكم لي الضحى
والخدم هادين عيالهم وأزواجهم و يايين يترزقون الله فلا تحرمهم من راتبهم أو تأخره أشوف من 19 الشهر وإنت شغال تيلفونات على خدمة الرد الألي مال بنكك تطالع المعاش نزل أو لا
والخدم يحسون فلا تستغرب إذا زعلوا إذا وصلهم مكتوب فيه أخبار خايسه من بلدهم,ولا تتفاجأ إذا فرحوا بشي زين سويته لهم أو إذا عطيتهم شي
فيا إخوه وأخوات الخدم بذمتنا ومسؤوليه يحاسبنا ربنا عليها فتوصوا فيهم وتواصوا فيهم
وأتقوا الله فيهم
T7l6m 
صح لسانك ، ارحم تُرحم ، اي و الله انهم يكسرون الخاطر و شحادهم غير الفقر ، و الدير اللي ايون منها الخدم، طايفين ديرتنا بوايد بالادارة و حسن التنظيم لكن الفقر ، و علي ابن ابي طالب كرم الله وجهه قال” لو كان الفقر رجل لقتله”
يا ناس عيالكم و بيوتكم امانة عند هالناس ، فكروا شوي !!! و ترى مهما سووا فهم بشر مثلنا، و الا انت ما تحلطم على مسئولك و كل شيء يسويه يعجبك !!!
صح لسانك أنت
والخدم نعمه مريحينا و مريحين حريمنا
وبنفس الوقت ترف لا يناله كثيرون في دول غنيه في أمريكا و أوروبا
بصراحة هالمشكلة تعور القلب والحديث فيها يطول
يعني شنو الواحد يحرم الخدم من أكل سنع، والا مكان زين ونظيف ينام فيه، والا حتى شي يفرحه وشوي يخفف عنه وحشة الغربة ..
شفت ناس بحياتي ما شفت مثل تعاملهم مع الخدم يعني شي يحز بالخاطر صج .. هذيل مو أوادم؟؟ مالهم حقوق؟؟ ماعندهم مشاعر؟؟ مالهم أهل وعيال وعوايل بديرتهم؟؟ ليش محسرين فيهم؟؟
وفي هم بالمقابل وايد ناس تخاف الله وترحم الخدم وتعاملهم أحسن معاملة ..
أهم شي نربي عيالنا على التواضع واحترام الخدم بحكم انهم أكبر منهم بالسن وهم ما نخلي عيالنا يعتمدون عليهم 100% ولا حتى يوجهون لهم لفظ يجرحهم ..
انا شخصيا ً ما أحب استخدم كلمة ” خادمة” جدام أحد أحس لقب مربية – ناني – أفضل من خادمة لأن اهي تشتغل وأعاملها كأنها موظفة ما أحسر فيها وأذلها .. يعني كافي زمنهم حدهم على الغربة وعلى هالشغلة نصير احنا والزمن عليهم؟؟
يعطيك العافية
فعلا أهم شي نربي عيالنا على التواضع واحترام الخدم وأن مايعتمدون عليهم 100%
وياريت الكل لهم نظره إنسانيه ناحية الخدم
لازم الجميع يعرف إن الخادم بالبيت يعمل كالموضف وليسوا عبيد أو ماملكت أيمانكم
ونحن مسؤلين عن طعامهم وملبسهم وراحتهم لكي يعود ذلك علينا بالعمل الجاد وبالاجر
ترى ناس فعلا على بالهم شارينهم
وحتى مكاتب الخدم يتكلمون بصيغة
بعتك الخدامه وإنت شريت الخدامه
النموذج الي ذكرته موجود بس ترى قلة قليلة،
الحمدلله الحين أشوف أكثر الناس يقدرون خدمهم ويعاملونهم أحسن معاملة،
ويعاملونهم كأنهم من أفراد العايلة-وهذا حق وواجب مو طيب-
والبعض مخلي الخادمة ملكة بالبيت وهالشي للأسف يخليهم يتمردون
أتمني إن تتناقص هذه القله حتى تختفي
وياريت الحكومه تمنع الشخص إللي أساء معاملة الخدم
وايسمحون له جلب خدم مره أخرى عقاب له
متى استعبدتم الناس وقد ولدتهم أمهاتهم أحرارا … عمر بن الخطاب رضي الله عنه في قصته الشهيرة (دعوة لبحث عن قصة هذه االمقولة)
فعلاً بعض الناس يعتقد أن الخادم في البيت أو المحل هو مملوك لرب البيت أو رب العمل، ولا يفهمون أن الخادم جاء بعقد عمل وليس عقد تملك الخادم ليس سيارة أو بيت ،، ويمكن بعض الخدم يتمنى يكون مثل سيارة معزبه عشان يهتم فيه ويداريه شوي.
أكثر المظاهر المنتشرة ودايماً ألاحظها .
– خادمه شايله عشر كياس جمعية وتمشي الساعة 2 الظهر بعد الدوام راد لبيت المعزب !!
– خادمه وليس خادم تغسل سياراة البيت يومياً الساعة 5 الفجر ويا ريت سيارة أو سيارتين قول أربع أو خمس.
– بالوزاراة وايد ألاحظ أن بعض الموظفين يستخدمون المراسل أو البورتر بغير محله أبدا يعني مطراش حمالي وخذ على الكلام.
الله يرحم الحال … ولاتلومون وتتهمونهم اذا شفتوا منهم الجرايم .
موضوع فعلا قوي. شكرا
ياريت المعزب والمعزبه يحطون نفسهم مكان الخدم بالشغل والأشياء اللي يكلفونهم فيها
نا وايد محتاجه شوية إنسانيه