ورد في إستطلاع مؤسسة جالوب الدوليه أن الكويتي(ذكورا وإناثا) يأتي في المركز 23 من حيث السعاده.وعلى الرغم من أن الإستطلاع شمل 155 دوله أي ان الكويتي أسعد من 132 شعب,إلا أني لم أقتنع بنتائج الإستبيان.
وبدافع من الغضب ,والحنق,
ورغبة في إظهار الحق ودحض الإدعاءات الباطله
وإستهجانا للمحاباة الغربيه
وبثورة ضد المعايير الغربيه المزدوجيه
وبالإستعانه بصديق
قررت خوض الإنتخابات ,لا غلط مو الحين
قصدي قررت البحث في خلفيات و مبررات الترتيب السئ والمسئ لنا.
وقد أخذت الموضوع على عاتقي دون إنتظار تحرك من وزارة الأعلام أو من سفاراتنا بالدول المعنيه
وإن كان دوري داعم للجهد الرسمي في هذا المجال ,إن وجد
وبعد إتصالات مكثفه مع المسؤولين عن الإستطلاع وعلى رأسهم السيد جالوب
وخلال حوارات ساخنه معهم تساءلت فيها مستنكرا:
بشنو أحسن من الكويتي النرويجي بوسنسون ولا الدانمركي شاوي البقر ولا الهولندي إللي كفخوهم بكاس العالم ولا ربع نوكيا الفنلنديين ولا الكوستاريكي إللي ما نشغله صبي عندنا كفو يطلع السادس
وبعد ماطلعت إللي بكبدي هدئني جالوب
ووضح لي أن الإستطلاع يتناول ضغوط الحياة إللي يعانيها المواطن في بلده
و أن الإستبيانات إللي وصلت من العينه اللي تمثل الكويتيين فيها كثير من الضغوط
وقال,بعظمة لسانه,إنهم طنشوا وايد من الظغوط لأنها سخيفه وركزوا على المهمه
وأرسلي نسخه منها بالفاكس
وراح استعرضها مع إخواني المواطنين لاحقا
T7l6m 
اقول قبل كنت تكتب خطابات حق الاحزاب الحاكمة في الدول العربية ؟؟؟
🙂
ذاك أول الأحزاب الحاكمه تقول هالكلام
الحين هالعبارات صارت تخصص كل من يريد إقتناص منصب سياسي
سواء بالإنتخاب أو التعيين
ME EXCLUDED
أنــا أقول بس لا ترجع تتحلطم !!!
النرويجي أبو سنسون ما أظن يعيبه السنسون بس احنا الكويتيين ما نخلي أحد يطوف إلا بطنازه !!
والدنماركي أهل البقر على الأقل بقرهم معيشهم وماهم محتاجين يحطون في مطاعمهم (اللحم المستخدم مجمد مستورد)
الهولندي اللي خسروا كاس العالم ….. يا أخي على الأقل وصلوا النهائي !! مو ربعنا 1982 وكاشخين فيها ليما الحين !!
والفلندي تشهد له الإجابة على السؤال التالي … كم بيت في العالم فيه جهاز نوكيــا؟؟ ((ونعم الانتاجية))
والكوستريكي والله ما أعرف حتى عاصمتها ولا شكل علمها ولا منو رئيسها …
طيب والكويتي شنو أفضل من اللي طافوا ؟؟
سكن مدعوم،أكل مدعوم،زواج مدعوم،ماي وكهربا مدعوم، حتى القز مدعوم (البنزين)
مدارس بلاش،علاج بلاش , و حتى القبر والكفن بلاش
و فوقها الراتب أكثر من العمل
على كل هذا ليش ما يصير أسعد إنسان في الدنيا
ولو مهما تكون سلبياتنا لازم نحس بالنعمه اللي إحنا فيها ونحمد ربنا ليل نهار
ولا تعاييرني إني أتحلطم