لا أريد من النواب التحدث كثيرا عن قضايا مطاطة وقابلة للتأويل ولا نعرف حدودها ولا أريد منهم كمواطن أن يتحدثوا عن قضايا كبيرة .لكن إذا النواب ملزمين كيفهم خل يتكلمون عن الفساد, وحقوق الإنسان, وتطوير التشريعات, والتنمية, وتحقيق العدالة الإجتماعية,والوحدة الوطنية,وتعزيز المواطنة,وأن تكون الكويت مركز مالي.وخلهم يتكلمون عن الشفافية والحوكمه والعولمه والمقلمه(هذي دعايه).لكن بعد كلامهم الكبير أريد إنجازات صغيرة ألمسها وأتحسسها وأستفيد منها وأدعي لهم بسببها.
موضوع نايم بإنتظار توقيع وزير المواصلات من 10 أشهر سيؤدي إلى زيادة المنافسة بين شركات الإتصالات وتدليل العميل وخفض الأسعار وهو نقل الأرقام بين الشركات الثلاث.ليش مايتبرع واحد من النواب ويقول للوزير راح اللي يدافع عن زين وعادي توقع القرار يعني بالعربي لا تخاف يا وزير ووقع.
شركات الإنترنت حلبونا ليما طفحوا وبعد شوية ضغط من المواصلات خفضوا الأسعار .ليش ما يقترح عضو على الوزير إنه يفتح الباب لإنشاء شركات إنترنت جديده أو تقوم وزارة المواصلات بالدخول كمنافس وتنزل الأسعار أكثر.
ليش ما ينصح واحد من الأعضاء وزير الشؤون ويقوله يلغي قرار الوزير الأسبق اللي حدد 10% كحد أقصى لأرباح المساهمين في الجمعيات التعاونية.بعض الجمعيات كانت نتائجها ممتازة وأرباحها كبيرة وتوزع 15%(الحد الأقصى السابق) والمساهمين يستفيدون من هالفلوس زائد إن إلغاء الحد الأقصى يفتح المنافسة ويميز أداء الجمعيات وبالتالي يزيد من رقابة المساهمين على مجالس إدارات الجمعيات.
ياجماعه الكلام الكبير زين لكن الناس تبي نتائج ملموسه.نبي عيالنا يروحون المدارس وميغيبون إلا بالعطله مو الحين المدرسه تقول لهم رجعوا بيوتكم قبل العطله بأسبوع وبعدها بيومين والمدارس تصفر من الطلبه مايصير.
نبي الأدوية تنباع بسعر معقول مايصير نفس الدوا بالسعودية ينباع بنص سعر الكويت وين الرقابة على جشع التجار(في هذه الحالة لماذا التواطؤ مع التجار حيث أن أسعار الأدوية في الكويت تحدده وزارة الصحة).
ليش أكو عمالة سايبه وتجار إقامات؟ليش علشان تطلع رخصه ,لو حق بقاله,المعامله طواله ولوعة جبد؟ليش عيالنا يتخرجون من الثانويه ومايقدرون يكملون دراستهم الجامعية ؟وليش إذا كملوها مايلقون وظايف؟ ليش هيئة الإستثمار تخزن فلوسنا بره الكويت؟ وليش ما تستثمر فيها؟
وايد أسئله,ووايد أشياء بسيطه نتايجها تفرح الناس وتحسسهم بالإنجاز والتغيير لا تغفلون عنها يانواب وأنتم تطاردون القضايا الكبيره.
