T7l6m

التجار عندنا مايشبعون وكثر مايقدرون يمصون المستهلك مصوه وشفطوا دمه.طبعا الحكومه متفرجه,والأعلام والجرايد آخر شي تفكر فيه المواطن لأن إعلانات التجار فلوسهاأكثر.
شركات الإنترنت لعبت وتلعب وستلعب فينا إذا محد وقّفها عند حدها.طبعا فوق أسعارها النار والشكاوي من تدني مستوى خدماتها طلعت هالشركات بفنتق يديد .فنتقها كله عياره وجمبزه لكن علشان تطّوفه إختارت له إسم وايد حلو”سياسة الإستخدام العادل”.طبعا الإسم ماله علاقه بالواقع وعلاقته مرتبطة فقط بوسيلة جديدة تستخدمها الشركات لرفع الأسعار وتخفيض سرعة الإنترنت للمشتركين.
المواطن المفروض يشد الظهر بالحكومه لكن الحكومه مسكيييييييينه موظفينها مالهم خلق,ومسؤولينها دايخين ومايدرون بحدود سلطاتهم وصلاحياتهم وإمكانياتهم للضغط على الشركات لتحقيق المصالح”العادلة”لهم وللمواطنين.يعني الله يرزق الشركات بحدود المعقول وما يطلّعون أرباح خيالية مقارنة بكل دول العالم على “أفانا” إحنا يالمواطنين.والحكومه مشكلتها فوق إللي قلناه إنها قاعده تحمي الإحتكار وتدعم القوة الجماعية للشركات بدلا من دعم قوتها التفاوضيه.فوزارة المواصلات تجتمع بممثلين كل الشركات بدلا من الإجتماع بممثل كل شركة منفردا.الشي الثاني إنها ضيقت من فرص دخول شركات أخرى وقللت المنافسة رغم أن شركات عربية وأجنبية “مبطله حلوجها”على سوقنا المربح جدا جدا جدا.
الأعلام ,وإنتو بكرامه,ماله شغل بالموضوع وما وده يزعل شركات الإنترنت إللي دعاياتها ترس الجرايد,فيختار السكوت أو تناول الموضوع بخجل.وعلى طاري الخجل,بعض الجرايد ما تستحي لأن شباب حملة”لا للإستخدام المحدود” طلبوا نشر بيان مدفوع القيمة في الجرايد ورفضت الجرايد نشره لأنه يخرّب علاقتهم بالمعلنين الطيبين والكريمين:شركات الإنترنت.

شباب من المدونين وعلى تويتر يقومون بحملة ضد الإجراءات الغير قانونية لشركات الإنترنت.أقول لهم الله يوفقكم و آنا معاكم. وأتمنى دعم الجميع للحمله وللشباب اللي يشتغلون فيها لأن نجاح الحملة نجاح لنا كمواطنين بتحقيق مصالحنا بتحركنا نحن وبجهدنا الذاتي ودرس وتحذير للمستغلين في كل المجالات :
“ديروا بالكم من الكويتي لا تزعلونه ولا تحاولون تبوقونه”.

وهذا موقع الحمله وفيه تغطية كاملة للموضوع
http://q8cap.wordpress.com/